Jýrnalıs Jarylqap Qalybaıdyń ústinen qozǵalǵan ákimshilik iske qatysty sot otyrysy jalǵasýda. Bastapqyda sýdıaǵa senimsizdik tanytqan Jarylqap Qalybaı búgin saraptama qorytyndysyn jasaǵan mamanǵa senimsizdik tanytty. Sýdıa onyń ótinishin qanaǵattandyrdy.

Búgin Almatydaǵy Ákimshilik sotta jýrnalıs Jarylqap Qalybaıdyń ústinen QR Ákimshilik quqyqbuzýshylyq Kodeksiniń 344-bap, 2-tarmaǵy boıynsha qozǵalǵan ákimshilik isti qaraý úshin sot otyrysy ótti. Almaty qalasy Almaly aýdandyq ishki ister basqarmasy tarapynan taǵaıyndalǵan sarapshy ózi jasaǵan saraptamalyq qorytyndyda «Ańyz Adam» jýrnalynyń Gıtlerge arnalǵan sanynda birese «ekstremızmdi aqtaý belgileri bar» dese, birese «ekstremızmdi aqtaý belgileri bolýy múmkin» degen dúdamal oı aıtypty. Ótken aptadaǵy sot otyrysynda Jarylqap Qalybaıdyń advokattary Ótegen Yqsanov pen Shynqýat Baıjanov sýdıa Dastan Alybaıdan: «Saýatsyz jasalǵan saraptama azamattyń taǵdyryna keri áserin tıgizýi múmkin. Sondyqtan saraptamany jasaǵan Nazgúl Aıtjanqyzy Muqanova sot otyrysyna qatysyp, bizdiń suraqtarymyzǵa jýap bersin», – degen ótinish aıtqan bolatyn. Alaıda, advokattardyń bul ótinishine prokýratýra ókili Maqsat Rsalın úzildi-kesildi qarsylyq tanytty. Alǵashqyda «saraptama jasaǵan eki sarapshyny biri – Ravılov kezekti eńbek demalysynda júr. Al Muqanova memlekettik «Bolashaq» baǵdarlamasy boıynsha Amerıka Qurama Shtattaryna bilim alýǵa ketti» degen. Biraq advokattardyń Ravılovqa qatysty suraǵy týyndamaǵandyqtan, tek Muqanovany ǵana sotqa shaqyrtýdy usyndy. Rsalın oǵan da qarsy boldy. Uzaq ýaqyt tartysqannan keıin sýdıa sarapshy Nazgúl Yqsanovany sot otyrysyna shaqyrýǵa sheshim qabyldaǵan. Biraq búgingi otyrysqa da Muqanova kelmedi.

Sot otyrysynyń sońynda sýdıa Dastan Alybaı saraptama qorytyndysyn qaıta jasatýǵa sheshim qabyldady. Oǵan sebep, Jarylqap Qalybaı da, onyń advokattary da prokýrordyń sarapshyny sot zalyna keltirýge qarsy bolǵan áreketine narazy bolyp, sýdıadan qaıta saraptama jasaýǵa ótinish bildirýi. Otyrys barysynda advokat Shynqýat Baıjanov: «Sot otyrysyna sarapshy Muqanovany ákeldirýge prokýrordyń ózi múddeli bolýy tıis edi. Sýdıaǵa «Siz shaqyrtý jiberseńiz de, sotqa kelmedi. Muqanovaǵa zań boıynsha tıisti sharany qabyldańyz» dep talap etýi tıis bolatyn. Ókinishke qaraı, ol kerisinshe, qarsylyq tanytty. Bul bizdiń kóńilimizge kúdik uıalatady», – dedi. Ótken sot otyrysynda da qarsy bolǵan prokýror Maqsat Rsalınge qarsylyq retinde, ol sýdıaǵa: «Meniń 20 jyldyq tájirıbemde kezdesetin jaıt, keıde sarapshynyń ornyna basqa bireýler qol qoıyp jiberedi nemese sarapshy bastapqyda jańylyp qorytyndyǵa qol qoıyp, keıin óz ustanymynan aınyp shyǵady. Túsinbeıtinim, prokýratýra ókili Muqanovany shaqyrtýǵa qarsy? Múmkin onyń ornyna basqa bireýler qol qoıǵan shyǵar? Bálkim Muqanovanyń saraptama qorytyndysyn jasaýǵa qaqy joq shyǵar?», – degen. Osydan keıin sýdıa Dastan Alybaı: «Nazgúl Muqanovany kelesi sot otyrysyna shaqyryp kóreıik», – dedi. «Shaqyryp kórdi», biraq sarapshy sottyń shaqyrýyn qulaǵyna qystyrǵan joq. Iaǵnı, kelmedi. Sol sebepti, sýdıa qaıtalama saraptama qorytyndysyn jasatýǵa sheshim qabyldady.

Alǵashqy sot otyrysynda «Ádil sóz» Halyqaralyq sóz bostandyǵyn qorǵaý uıymy janyndaǵy Aqparattyq daýly qujattar boıynsha lıngvısıkalyq saraptama jasaıtyn Rahılá Qarymsaqova hanym ózi jasaǵan saraptamalyq qorytyndydaǵy «ekstremızmdi aqtaýdyń belgileri joq» degen ustanymyn sýdıa men sotqa qatysýshylarǵa egjeı-tegjeıli túsinidirip bergen edi. Sol kezde lám-mım jaq ashpaǵan prokýror Maqsat Rsalın ekinshi sot otyrysynda 40 jyldyq eńbek ótili bar Rahılá Qarymsaqovanyń kásibı biliktiligine kúmán keltirgen bolatyn. Sol otyrysta Qarymsaqova hanym joq bolǵandyqtan, búgin arnaıy kelip, óziniń Qazaqstandaǵy sot ókilderimen, sýdıalarmen qoıan-qoltyq jumys istegenin, kezinde prokýrorlarǵa qylmystyq taqyryptarǵa oraı leksıa oqyǵanyn dáleldeıtin dáıekter keltirdi. «Ádil sóz» uıymynyń ókili Ǵalıa Hakımqyzy Ájenova hanym da uıym men onyń atqaratyn sharýalary týraly bizge áńgimelep berdi.

Búgingi sot otyrysyna Jarylqap Qalybaıdy qoǵamdyq qorǵaýshy retinde qatysqan azamat – Jeńis Lekerov elimizdi azamattyq qoǵamǵa aınaldyrý úshin azamattardyń qoǵam ómirine belsene aralasýyn qamtamasyz etý kerektigin aıtty. «Jarylqap Qalybaıdy eki aıda 3 ret sotqa beretindeı, jaý shapty ma? Nege sonsha qýdalaıdy?! Azamattar túgel arasha túsýi tıis edi. Ókinishke qaraı, qoǵam belsendi emes», – dep málimdegen ol Qazaqstandy demokratıalyq qoǵamǵa aınaldyrý jolynda qolynan kelgenshe úles qosatynyn jetkizdi.