Túrkıa Syrtqy ister mınıstri Mevlút Chavýshoglý Sırıa problemasyn retteýge arnalǵan kelissózder 23 qańtarda Astanada ótetindigin málim etti.
Buǵan deıin túrik SİM basshysy Reseı sarapshylary Sırıa boıynsha kelissózderge daıyndyq máselelerin talqylaý úshin 9-10 qańtarda Túrkıaǵa keletindigin málim etken bolatyn, dep jazdy Reseıdiń Jańalyqtar aqparat agenttigi.
Buǵan deıin Prezıdent Pýtın túrik kóshbasshysy Taıyp Erdoǵanmen Sırıada qaqtyǵysýshy taraptarǵa Astanada jańa alańda beıbit kelissóz úderisin jalǵastyrýdy usyný jaıly ýaǵdalasqanyn habarlaǵan. Onyń aıtýynsha, bul Jeneva kelissózderin tolyqtyrady. Qazaqstan Prezıdenti Nursultan Nazarbaev Pýtın jáne Erdoǵanmen telefon arqyly sóılesý barysynda bul bastamany qoldap, Qazaqstan elordasynda mundaı kelissózder júrgizý úshin qajetti jaǵdaı jasaýǵa daıyn ekenin málimdedi.(inform.kz)
EO Sırıa boıynsha kelissózdiń Astanada ótýin qoldaıdy
Sırıa máselesi boıynsha kelissózdiń Astanada ótýin Eýroodaq qoldaıdy. Bul týraly Eýropalyq odaqtyń syrtqy ister jáne qaýipsizdik saıasatynyń joǵarǵy ókili Federıka Mogerını málimdedi. Eger soǵysty toqtatý kelisimi oryndalatyn bolsa, BUU qaýipsizdik keńesi aıasynda Sırıanyń ishki máselesin retteýge jol ashylady, - deıdi eýropalyq dıplomat. Eýroodaq Sırıadaǵy qaqtyǵystardy beıbit jolmen sheshýge umtylatyn kez-kelgen halyqaralyq qadamdy qoldaıdy. Biz Astanadaǵy kezdesý sekildi bastamalar ózge taraptardan da bolǵanyn qalaımyz. Ol kelissózder jemisti aıaqtalyp, Sırıanyń ishki máselesine qatysty BUU aıasynda Jenevada ótetin basqosýǵa áserin tıgizse deımiz. Eýroodaq aımaqtarmen jumys isteýin jalǵastyra beredi. Biz qańtar aıynyń ortasynda Brússelde bas qosyp, Sırıa qaqtyǵysyn sheshýge baǵyttalǵan ekijaqty kelissózder ótkizýdi josparlap otyrmyz, - deıdi Federıka Mogerını. (24.kz)
Sırıa opozısıasy kelissózdiń Astanada ótýine qarsy
Birneshe sırıalyq baskóterýshi top ókilderi Qazaqstanda ótetin beıbit konferensıaǵa qatysýdan bas tartatyndyqtaryn málim etti.
Olar Asad kúshterin soǵysty toqtatý rejımin buzdy aıyptap otyr. Málimdemede kóterilisshilerdiń tatýlastyq sharttaryn qatań ustanyp otyrǵandyǵy aıtylǵan. Alaıda, úkimet kúshteri ırandyq odaqtastarynyń qoldaýyn paıdalana otyryp, Damsk, Shyǵys Gýta men Vadı-Barada alqabynda kelisilgen sharttardy birneshe márte buzǵan.
Kóterilisshiler eger Asadtyń kúshteri tatýlasý kelisimin paıdalanyp, baskóterýshilerdiń qaramaǵyndaǵy aımaqtardy basyp alýǵa tyrysatyn bolsa, ózderiniń kelisimnen bas tartatyndyqtaryn málimdedi.
Beıbit kelissózder osy aıda Astanada bastalýy qajet bolatyn. 31 jeltoqsan kúni BUU-nyń Qaýipsizdik Keńesi Sırıadaǵy soǵysty toqtatý men Damaskiniń opozısıa ókilderimen kelissózder júrgizýdi bastaý jónindegi Reseı tarapynan daıyndalǵan kelisimderdi qoldaý týraly rezolúsıany biraýyzdan qabyldady. Rezolúsıa úkimet pen kóterilisshiler arasynda kelissózder júrgizý jolymen qaqtyǵysty saıası turǵyda retteýge shaqyrady. 30 jeltoqsannyń túninen bastap, tatýlastyq týraly kelisim kúshine endi.
Alaıda kelisimniń Reseı men ózge de memleketterde qyzmetine tyıym salynǵan «Islam memleketi», «Djabhat Fateh ash-SHam» sıaqty keıbir toptarǵa eshqandaı qatysy joq.(naryk.kz)
