3 qańtarda Qazaqstan BUU Qaýipsizdik Keńesiniń turaqty emes múshesi quqyǵynda Keńestiń 2017 jylǵy birinshi otyrysyna qatysty. Bul týraly QR-nyń Syrtqy ister mınıstrligi habarlaıdy.
Otyrys barysynda Qaýipsizdik Keńesiniń 2017 jylǵy qańtar aıyna jumys baǵdarlamasy bekitildi. Otandyq delegasıany Qazaqstan Respýblıkasynyń Ýaqytsha senimdi ókili Barlybaı Sadyqov usyndy.
Sol kúni Qaýipsizdik Keńesiniń músheleri – AQSH, Bolıvıa, Japonıa, Italıa, Qazaqstan, Qytaı, Mysyr, Reseı, Senegal, Ýkraına, Ýrýgvaı, Ulybrıtanıa, Fransıa, Shvesıa jáne Efıopıa jáne delegasıalar basshylarynyń dástúrli kezdesýi bolyp ótti. İs-shara 2017 jylǵy qańtar aıynda QK basqaratyn Shvesıa Koróldiginiń mısıasynda osy eldiń Turaqty ókili Olaf Skýgtyń tóraǵalyǵymen ótti.
BUU Qaýipsizdik Keńesi músheleriniń aldynda sóılegen sózinde B. Sadyqov osy organnyń jumysyndaǵy preventıvti dıplomatıa jáne senim sharalaryn nyǵaıtý, ıadrolyq qarýdy taratpaý, daý-janjaldy retteý jáne halyqaralyq terorızmge qarsy áreket etý sıaqty Qazaqstan úshin basymdyqqa ıe máselelerdi atap ótti. Osy mánmátinde ol Qazaqstan Prezıdenti Nursultan Nazarbaevtyń osydan 25 jyl buryn BUU qabyrǵasynda jarıalanǵan Azıadaǵy ózara yqpaldastyq jáne senim sharalary jónindegi keńesti shaqyrý týraly bastamasynyń tabysty iske asyrylǵandyǵyn jáne osy únqatysý forýmynyń Azıa qurlyǵynda qaýipsizdikti nyǵaıtýǵa qomaqty úles qosyp kele jatqandyǵyn atap ótti. Otandyq dıplomat Memleket basshysymyzdyń «Álem. HHİ ǵasyr» manıfesiniń ózektiligin atap kórsete otyryp, 2045 jyly BUU qurylýynyń júz jyldyǵyna ıadrolyq qarýsyz, soǵyssyz jáne daý-janjalsyz álem qurýǵa birlesip kúsh-jiger jumsaýdyń mańyzdylyǵyna nazar aýdardy.
4 qańtarda Sırıadaǵy (eldegi hımıalyq qarýmen baılanysty ahýal) jáne Iraktaǵy (gýmanıtarlyq aspekt) jaǵdaı boıynsha Keńestiń jabyq konsýltasıasy bolady.
Aıdyń negizgi is-sharalarynyń biri osy jyldyń 10 qańtaryna josparlanǵan BUU QK-niń «Daý-janjaldardyń aldyn alý jáne beıbitshilikti saqtaý» taqyrybyndaǵy joǵary deńgeıli ashyq pikirtalastary bolmaq, olardyń barysynda Keńes músheleri ózderiniń osy saladaǵy basymdyqtary men BUU jańa basshylyǵyna qoldaýlaryn bildiredi dep kútilýde. Pikirtalastarǵa BUU Bas hatshysy Antonıý Gýterrısh jáne Qaýipsizdik Keńesine múshe memleketterdiń syrtqy saıası vedomstvolarynyń birqatar basshylary, sonyń ishinde Qazaqstannyń Syrtqy ister mınıstri Qaırat Ábdirahmanov qatysady.
17 qańtarda turaqty ókilder deńgeıinde Taıaý Shyǵystaǵy jaǵdaı, sonyń ishinde Palestına máselesi boıynsha toqsan saıynǵy dástúrli ashyq pikirtalastar ótedi.
Qaýipsizdik Keńesiniń sheshimine sáıkes, jyldyń alǵashqy aıynda brıfıńter men jabyq konsýltasıalar barysynda Iemen, Kongo Demokratıalyq Respýblıkasy, Ortalyq Afrıka Respýblıkasy (OAR), Sýdan (sonyń ishinde Darfýr jáne Abeı provınsıalaryndaǵy) jáne Ońtústik Sýdan, Batys Afrıka jáne Sahel, Malı, Chad, Somalı, Kıpr, Kolýmbıa elderi men óńirlerindegi ahýal, sondaı-aq Iran ıadrolyq baǵdarlamasy boıynsha 2231 qararyn oryndaý máseleleri talqylanady.
Qazaqstan tóraǵalyǵymen Somalı men Erıtreıa jónindegi jáne terorıstik toptarmen kúres jónindegi BUU QK komıtetteriniń otyrystary ótedi.
2017 jylǵy qańtar aıynda Kıprdegi jáne OAR-daǵy ahýal, sondaı-aq QK músheleriniń arasynda bátýalastyqqa qol jetkizilgen jaǵdaıda Sırıa Arab Respýblıkasyndaǵy hımıalyq qarýmen baılanysty ahýal boıynsha Qaýipsizdik Keńesiniń josparly qararlarynyń qabyldanýy kútiledi.
