Aıta keteıik, 2017 jyldyń 8 qańtarynda shamamen saǵat 03.30-da Shymkent qalasynda Halyqtar dostyǵy kóshesinde ornadasqan eki qabatty úılerdiń birinde gaz balony jarylyp, eki qabatty úı qıraǵan, úı tolyqtaı qırap, jaramsyz bolyp qalǵan.

QR Ulttyq ulan 6506 áskerı bóliminiń áskerı qyzmetshisi Bahramov Rýslan oqıǵa bolǵan úıdiń mańynda turady eken. Ol jarylysty estip, kóshege júgirip shyqqan. Osy sátte qıraǵan úı jaqtan balanyń jylaǵan daýsy estiledi. Rýslan Bahramov áıeline jedel járdem men órt sóndirý qyzmetine qońyraý shalýdy buıyryp, aıǵaı estilgen jaqqa júgirgen. 

Baspasóz qyzmetiniń málimetinshe, Rýslan Bahramov der kezinde batyl áreket etip, úıindiniń astynan Jumalıevter otbasyn alyp shyqqan. "D.D.Jumalıev, onyń áıeli, bir jasar qyzy jáne áıeliniń sheshesi dalaǵa shyǵarylǵan, alaıda Jumalıevtiń áıeli alǵan jaraqatynan qaza tapty", - delingen habarlamada.

Otbasyny úıindi astynan alyp shyqqan starshınany marapattaý týraly usynys jasalǵany aıtylady.

Aıta keteıik, osyǵan deıin apat-qutqarý sharalary barysynda OQO Tótenshe jaǵdaılar departamentiniń qyzmetkerleri - 23 adam jáne 3 arnaıy tehnıka, apatty-qutqarý jasaǵynyń 44 adamy jáne 6 arnaıy tehnıkasy (olardyń ishinde kınolog mamandar men ıtter, medısınalyq-psıhologıalyq qyzmettiń mamandary), órt sóndirý jáne apatty-qutqarý jumysynyń - 17 adamy men 4 arnaıy tehnıkasy, Apatty medısınalyq ortalyǵynyń 3 qyzmetkeri, 4 jedel járdem kóligi quramynda 16 adam jáne 4 arnaıy tehnıka tartylǵany habarlanǵan edi.

OQO İİD 30 qyzmetkeri oqıǵa bolǵan jerdi qorshaýǵa alyp, sonymen qatar 4 energetıka jáne gaz salasynyń mamandary osy aýdandaǵy elektr qýaty men gazdy óshirgen edi.