Áleýmettik jelide dinı kózqarastaryn batyl aıtyp, qyzdy-qyzdymen meshitten bastap qaýipsizdik organdarynyń qyzmetine deıin synap-minep tastaıtyn Talǵat Rysqulbek esimdi jeli qoldanýshysy Rojdestvo qarsańynda taǵy da atqa qonypty. Bul jolǵy nysanasy – múftıat ta, UQK da emes, osyǵan deıin el ózimen pikirles, múddeles dep sanap kelgen Májilis depýtaty, jyrshy, Ulttyq sport túrleri qaýymdastyǵynyń basshysy Bekbolat Tileýhan. 19 qańtar kúni Astanada konsert bergeli otyrǵan jyrshyny T. Rysqulbek baq pen bılikti kótere almady, nápsige erip ketti dep aıyptapty. Jurttyń jaǵasyn ustatpasa da, kóptiń tańdanysyn týǵyzǵan Talǵattyń bul tápsirleýinen túsingenimiz, qolyna dombyra alyp, sahnaǵa shyqqan jan nápsisin tyıa almaǵan, Allasynan alystap, jynnyń jeteginde ketken adam eken.

«Jel turǵanda túıeni shaıqaltsa, eshkini kókten izde» deýshi me edi...
Bekbolattyń dúıim jurtty jınap, estradamen konsert berýi, qansha Taýhıdshil desek te, aqylǵa qonymsyz ekeni ras. Ulttyq fólklor dep, dombyrasyn qushaqtap biraz júrdi de, mine endi, qansha degenmen nápsisiniń deńgeıin kórsetip tyndy. Júz jerden aqtasaq ta, Sharıǵat túgili, Ata-babam bulaı batystyń dańǵaza-estradasymen «konsert» qoımaǵan edi. 

Jaqtaýshylar ózine aıtpadyń ba dersińder, ózimen sóılesip, aıtýdaı-aq aıttym-aý... Tyńdar qulaq kórmedim. 

Baq, baılyq, bılik berip synalǵanda, Imandynyń ımandysy ǵana, nápsisine ıe bop qalatyny aqıqat. Iá, men túsinemin Bekeńdi. Depýtat bolý ońaı emes, árıne. Eki júz myń xalyqtyń, bireýiniń ǵana qolynan keler sharýa emes pe... Desek te, ótkende búkil oblystan «ıt» qosyp qýylǵan «91» tobynyń osynshama jekkórinishti bolǵany, Qazaqqa jat «kórinisi» edi. Bile bilseńder, olar da osyndaı «tıpa normalnyı» estradalyq mýzykadan bastap, osy «jekkórinishti» deńgeıge biraq jetip tynǵan edi. Bekbolat ondaı «deńgeıge» bara qoımas, biraq sol dańǵazanyń bastaýyn jastarǵa ózi ashyp berip otyrǵan joq pa eken...?!

Bir ALLAHQA qulshylyq etip-aq júrgen shyǵar, degenmen jeme-jemge kelgende nápsisiniń qurbany bolǵany ókinishti-aq», - dep jazady T. Rysqulbek.

Jalpy, jyrshylyq ónerimizdiń búgingi tańdaǵy júırigi, ulttyq sporttyń janashyrlarynyń biri Bekbolat Tileýhanǵa qarsy baǵyttalǵan synı pikir bir bul emes. T. Rysqulbektiń Bekbolatqa qarsy baǵyttalǵan sondaı jazbalarda buryn da aty atalǵan. Máselen, aqyn Serik Boqan aldyńǵy bir jyldary «Bekbolat adasyp júr» dep maqala jazyp, onda Bekeńniń taýhıdshildigin Talǵattan tómen etip kórsetkeni bar.

Al, Bekbolat Tileýhanǵa bul jolǵy shúıligýdiń túpki sebebi depýtattyń dinı seniminde jatyr ma, joq álde Bekeńe shúıligýshilerdiń shynymen de ulttyq óner men salt-dástúrdi syrtqa tebetin teris aǵymnyń jeteginde ketkeninen be, ol jaǵyn tap basyp aıtý qıyn. 

Osy oraıda, jyrshy Bekbolat dinı ýaǵyzshy retinde qurmetteıtin Daryn Mýbarovtyń T. Rysqulbekpen quda ekenin de tilge tıek ete ketken jón.