Bekbolat aǵany ónerge qaıtyp keldi dep nege shýlap jatyrsyzdar? 2009 jyly Astanada, sol kezdegi premer Kárim kókemizden bastap, úkimet músheleriniń kópshiligi tapjylmaı otyryp tamashalaǵan "Elim meniń" konsertin kórmegensizder-aý. Iýtýbta bar. Sosyn 2011 jyly Táýelsizdiktiń 20 jyldyǵyna arnap Kongres-Hollda zaldy lyq toltyryp taǵy bir konsert bergeni este. 2014-te qytaı qazaqtaryna arnaıy kesh ótkizip qaıtty. Ol da jelide júr. Áziret Sultan meshiti terme báıgesin ótkizgende, qatelespesem, 2012 jyly, Bekbolat aǵanyń qajylyqtan kelgen kezi bolsa kerek, tyqyr shashpen, basyna taqıa kıip shyqqanyn kórdik sahnaǵa. Ónerdi haram degen adam olaı etpese kerek edi. Jyl saıyn táýelsizdik merekesine arnalǵan úlken saltanatty jıynda án shyrqap júrgenin bylaı qoıǵanda, eki-úsh jyl ilgeride “Juldyzdar otbasy” uıymdastyrǵan jyl áni konsertinde án shyrqady. Astana men Almatydaǵy, aımaqtardaǵy jıi uıymdastyrylyp turatyn kezdesýleriniń sońy kishigirim konsertke ulasyp jatatynyn sol keshterge kelgen jastar jaqsy bilse kerek. Toı-tomalaqtarda qolqalaǵan aǵaıynnyń kóńilin qaldyrǵan kezin kórmedik, qonaq kádesin usynyp, aımaq-aımaqtyń jyrlarynan assortı jasap shashýyn shashyp ketip júrgenine bir emes, birneshe ret kýá bolǵan jaıymyz bar. Alypqashpa áńgime týdyryp jatqan aǵaıynnyń renishi “jyltyńdap efırge shyǵa bermedi” rápátti bolsa, onyń jaýaby dindegi emes, ónerdegi ustanymynda, qyzmettegi múmkindiginde jatsa kerek dep topshylaımyn óz basym. 
Qaıtyp keldi dep ketken adamǵa ǵana qarata aıtylatynyn eskersek, Tileýhan ónerge qaıtyp kelgen joq. Ol sonda júr.