Almaty oblysynyń Halyqqa qyzmet kórsetý ortalyǵynda er adam qaza boldy. Oqıǵa İle aýdanyndaǵy Ótegen batyr kentinde bolǵan dep habarlaıdy NUR.KZ.
Nur.kz redaksıasyna Rınat Avazbakıev esimdi oqıǵa kýágeri habarlasyp bolǵan jaıtty baıandady. Onyń aıtýynsha, qaza bolǵan er adamnyń jasy 60-65 shamasynda. Sonymen birge ol shaǵymyn da jetkizdi.
"Kezekte 100-ge jýyq adam turady. Ár adamǵa 20 mınýt ýaqyt ketedi degen ýáde oryndalmaǵan. Tirkeýmen tek eki adam ǵana aınalysyp otyr. Bireýler tipti senbiden beri tirkele almaı álekke túsýde. Soǵan qaramastan, sondaǵy "zań ókilderi" aıyppul salamyz dep qorqytyp júr", - deıdi er adam.
Almaty oblysynyń İİD 1957 jyly týǵan İle aýdanynyń turǵyny qaıtys bolǵanyn rastady. Qazirgi ýaqytta quzyrly organdar er adamnyń ólimine qatysty tekseris júrgizip jatyr. Tolyq aqparat keıinirek beriledi.
Osy oraıda Almaty oblystyq İİD aýdandyq polısıa bólimshesi jańa zańnamany túsindirý jumystary boıynsha BAQ ókilderimen kezdesip, ýaqytsha tirkeýge qatysty HQKO-tarynda keleńsiz jaǵdaılar týyndamaǵanyn aıtqan.
Esterińizge sala ketsek, ýaqytsha tirkeý týraly zańdy elimizde 7 qańtardan bastap engizdi. Al tirkelmegen azamattarǵa 2017 jyldyń 1 aqpanynan bastap aıyppul salyna bastaıdy.
Ýaqytsha tirkeýge turǵylyqty jeri boıynsha tirkelmegen adamdar turýy qajet. İshki kóshi-qon máselelerin baqylaýdy ýchaskelik polısıaǵa júktep otyr. Zań buzýshylardy olar burynnan kele jatqan úırenshikti ádis-tásildermen anyqtaıdy.
