Astanada páterin jalǵa berýshi eki balasy bar anany ýaqytsha tirkeı almaǵany úshin páterden shyǵaryp jatyr, - dep habarlaıdy "Krysha".
"Jalǵa berýshiler memlekettik baǵdarlama boıynsha páter kezeginde turǵanyn aıtyp, páterdi óz attaryna aýdara almaıtynyn jáne ýaqytsha tirkeýge qoıa almaıtynyn aıtty. Ol bizge 24 qańtarǵa deıin ýaqyt berdi, alaıda biz ol ýaqytqa deıin yńǵaıly páter taba almaıtyn sıaqtymyz", - dedi Botagóz Sultanova.
Otbasyndaǵy úlkeni - alty jastaǵy Ádil - onkologıalyq aýrýǵa shaldyqqan. Onyń jaqynda ınfeksıa juqtyryp, bir kózi kórmeı qalǵan.
"Ádil 2013 jyly aýyryp bastady. Onyń shet eldegi emine biz kóligimiz ben meniń atyma tirkelgen jataqhanadaǵy bólmemizdi sattyq. Qazir kúıeýim men balam "Múgedek balany tárbıelep otyrǵan otbasylarǵa arnalǵan baǵdarlama" boıynsha kezekte tur. Osyǵan jáne balamnyń aýrýyna baılanysty bizge bir jerde turaqty tirkeýde bolý qajet", - dep túsindirdi Botagóz.
Basylymnyń málimetinshe, astanalyq turǵyn jumys isteı almaıdy, sebebi balalaryna qaraýy tıis: Ádildiń múmkindigi shekteýli jandarǵa beriletin zeınetaqy men járdemaqysy 52 myń teńge, sonymen qatar páterdiń aqshasy men bes jastaǵy Adınniń balabaqshasyna aqsha tóleý qajet. Úıde tek kúıeýi ǵana jumys isteıdi.
Osy oraıda Botagóz astanalyqtardan kómek surady. Facebook jelisinde onyń úndeýin Laýra Túsipbekova óz paraqshasynda jarıalady.
"Bizge Astanadan bir bólmeli páter qajet, uzaq merzimge, mindetti túrde ýaqytsha tirkelý qajet, shamamen 70 myń teńge + komýnaldyq tólemder. Eń bastysy - qurǵaq bolǵany. Ádilge ylǵaldy jerde turýǵa bolmaıdy. Múmkin bolsa, agroqalashyq, vokzal aýdandarynda, Gersen kóshesi kólikter kóp qatynaıtyn jerde bolsa durys bolar edi, sebebi kóligimiz joq", - delingen jazbada.
