Opozısıalyq Jalpyulttyq sosıal-demokratıalyq partıasy (JSDP) Qazaqstan bıligin zańdarǵa engizilgen azamattardy ýaqytsha tirkeýge turýdy mindetteıtin jańa talaptardy joıyp, kóshi-qon máselelerin yqtıatty túrde sheshýdi talap etti. Bul týraly «Azattyq radıosy» habarlady.
Partıa 10 qańtarda taratqan málimdemesinde kóshi-qon zańdaryna azamattardy ýaqytsha mekenjaıy boıynsha tirkeýge turýdy mindetteıtin ózgerister esh daıyndyqsyz, asyǵys jáne múldem josyqsyz engizildi dep sanaıdy.
Partıa kóshi-qon ózgeristeri Qazaqstan konstıtýsıasynyń 21-baby men Azamattardyń saıası jáne azamattyq bostandyǵyna kepildik beretin halyqaralyq paktige áser etip otyr deıdi.
"Asyǵystyq saldarynan halyqqa qyzmet kórsetý ortalyqtarynda halyq yǵy-jyǵy bolyp, polısıa qyzmetkerleri men sheneýnikter biliksizdigin kórsetti" degen JSDP úkimet pen parlament ýaqytsha tirkeý týraly sheshimdi muqıat oılanbaı, jaýapkershiliksiz qabyldaǵan dep sanaıdy.
JSDP tirkeý máselesi aýyl sharýashylyǵyn damytý jáne jańa jumys oryndaryn ashý, Qazaqstannyń kez-kelgen jerinde laıyqty ómir súrýge múmkindik berý arqyly sheshilýi kerek deıdi.
Qańtardyń basynda Qazaqstanda azamattardy ýaqytsha mekenjaıy boıynsha tirkeý týraly kóshi-qon zańdaryna engizilgen túzetýler kúshine engen. Endi turǵylyqty jerinen tysqary jaqqa bir aıdan asatyn merzimge barǵan ár qazaqstandyq memlekettik baj salyǵy retinde 227 teńge tólep ári halyqqa qyzmet kórsetý ortalyǵyna baryp ýaqytsha mekenjaıy boıynsha tirkeýge turýy tıis. Bul talap qonaqúıde turyp, ózge qalada jumys isteıtin adamdarǵa da, ózge qaladaǵy aýrýhanada jatyp uzaq emdeletin adamdarǵa da qatysty. Alǵashqylaryn qonaqúı ornalasqan mekenjaı, al ekinshilerin emdeletin orny boıynsha tirkeıdi. Bul talapty oryndamaǵandarǵa jeti AEK (aılyq eseptik kórsetkish) kóleminde, ıaǵnı 16 myń teńge aıyppul salynady.
