Keshe ǵana taǵaıyndalǵan Ulttyq ekonomıka mınıstri ultynyń tilin bilmeıtin bolyp shyqty…
Tımýr Súleımenov Parlament Májilisi otyrysynan soń tilshilerge :«Máskeýde bes jyl boıy qyzmet etip, týǵan tilimdi umytyp qaldym. Biraq alty aı ishinde úırenip alamyn», — dedi dep jazady «Qazaq úni» ulttyq portaly.
Bulaı memlekettik tildi umytyp qaldym, ana tilimdi bilmeımin dep esh qysylmaı, saltanatty túrde málimdeıtin mınıstr álemde tek Qazaqstanda ǵana bolady… Parlamentte de, «Aý, memlekettik tildi bilmeı, qalaı memlekettiń mınıstri bolasyń?» - deıtin bir depýtat joq… Mysaly, Ózbekstanda osylaı «ózbek tilin umytyp qaldym» degen mınıstr bola ma? Qyrǵyz elinde de da bolmaıdy. Taǵy da ózbek pen qyrǵyz «mańqa qazaq» dep mazaqtasa, shyjbalaq qaǵamyz. Bul parlament aldynda «Mıymdy aýystyrmasańdar, qazaq tilin úırene almaımyn» degen eks-syrtqy ister mınıstri Erlan Ydyrysovtan keıingi ekinshi oryndaǵy málimdeý boldy. «Memlekettik tilge mıy jetpegender qalaı mınıstr bolady?.. Bizde mısyz mınıstr, mısyz ákim, mısyz depýtat, mısyz sheneýnikter bolýy zańdylyq bolsa, onda biz qandaı elmiz?» Memlekettik tildi bilmese de, Erlan Ydyrysovty eki ret mınıstr qylyp, 20 jylda óziniń jaqsy biletin tilindegi el Ulybrıtanıaǵa ekinshi ret elshi etip, zorǵa qutylyp edik, endi mynaý, taǵy bir Reseı tilinde sóıleıtin mınıstr keldi… Máskeýde 5 jyl turǵanda qazaq tilin umytyp qalypty-mys. Aý, ómir boıy Qazaqstanda turyp kele jatqan ózge ult ókilderi, nemis, ózbek, uıǵyr, sheshen, armán, grýzın, azerbaıjan, káristerdiń mınıstr emes…. qarapaıym adamdarynyń ózi nege ana tilderin umytyp qalmaıdy, mınıstr myrza? Qyryq jasqa jaqyndaǵan siz 5 jyl Reseıde tursańyz, 35 jyl Qazaqstanda, otanyńyzda turdyńyz ǵoı… Sonda óz elińizdegi 35 jyl ózge eldegi 5 jylǵa qaraǵanda bosqa ótken be? Osyny bir sát oılanyp kórdińiz be? NEGE?
Baıaǵyda shalǵaıdaǵy Shardarada, Qyzylqumda ósken meniń bir Baqyt degen synyptasym Reseıge úsh jyldyq áskerge baryp kelip, «chto takoı baýrsak?»- dep, «qazaqshany umytyp qalyp» oryssha sóılep júrdi. Qyrmanǵa baryp qalǵanda kúrish tazalap jatqan aǵaıyndaryna oryssha shúldirleı bastaǵanda, Jarylqap degen kókemiz áke-sheshesinen túk qoımaı sybap, dáý kúregimen qyrmandy aınaldyra qýǵanda álginiń «oıbaı. kóke, qoıdym, endi oryssha sóılemeımin» degen jan daýysy qazaqsha shyǵyp ketken edi…
Bizdiń memlekettik tilin bilmeı memlekettik qyzmetker bolyp, laýazym ıelenip júrgen mınıstrler, ákimder, depýtattar, jalpy sheneýnikterge 25 jyl Reseı tilinde sóıleýge ruqsat berip qoıǵan Elbasymyz da endi shırek ǵasyrdan soń, «Jetti endi!» dep, jaqsylap qazaqsha sybap alsa, birden qazaqsha saırap shyǵa keler edi barlyǵy….
Mınıstrler memlekettik tilin umytady, al biz «Arman, arman, arman-aı» degen ándi qashan umytar ekenbiz…
P.S. Tımýr Súleımenov myrza, myna sizge arnalǵan maqalany Reseı tiline aýdaryp jazatyndaı, Máskeýde júrgen joqpyz, sondyqtan mınıstrligińizde qazaqsha biletin bireý bolsa, aýdartyp alyp oqyp, jaýap berýińizdi suraımyn.
Qazybek ISA
