Mynaý sýrettegi qara tas jurttyń bárine tanys. Bul – Almatydaǵy Naýryzbaı batyr men Qabanbaı batyr kósheleriniń qıylysynda ornalasqan aıadaı ǵana saıabaqtyń shyǵys jaǵynda turǵan tas belgi. Qara tastyń ornyna 1931-1933 jyldardaǵy asharshylyq qurbandaryna arnalǵan eskertkish ornatý josparlanǵan. Ol jospar 22 jyl boıy júzege aspaı keledi. Endi kelip, qara tasty qalanyń syrtyna shyǵarý týraly «bastama» kóterilipti.

Qara tasqa qarsy «bastama» kóterip, qala ákimshiligine qaıyrylǵandar saıabaq mańyndaǵy turǵyndar kórinedi. 22 jyl boıy eshbir pendeniń záresin alyp, qorqytpaǵan qara tastan aıaq astynan bireýler shoshynyp, jastarǵa teris áser etip jatyr depti. Al, qalalyq ákimshilik bolsa, shoshynyp qalǵan turǵyndardyń ótinishin qarap jatyr eken. Biraq, ákimshilik qara tasqa qarsy adamdardyń aty-jónin jarıa etpeı otyr.

Tap osy máseleniń tóńireginde birneshe saýal týyndaıdy.

1. 22 jyldan soń ǵana baryp, qara tastan shoshynyp, jastardyń qamyn oılaǵan ol qandaı turǵyndar?
2. Memleket pen ult tarıhynyń eń qasiretti hám qaıǵyly tusy – asharshylyq qurbandarynyń rýhyna qarsy shyǵyp, olardyń myńdaǵan urpaqtarynyń namysyna tıetin iste qala ákimshiligi shaǵymdanýshylardyń aty-jónin jarıalamaı nege jumbaq jasyryp otyr?
3. Qara tastyń orny basqa BİREÝDİŃ bolmasa áldebir RÝDYŃ batyrynyń  búst nemese eskertkishine qajet bolǵandyqtan ákimshilik qara tasqa qarsy turǵyndardy 22 boıy izdep, aqyry tapty ma eken?
4. Asharshylyq qurbandaryna arnalǵan eskertkishtiń áli kúnge orynatylmaı kelgenin ákimshilik qalaı túsindiredi?

 Bul saýaldarǵa turǵyndardyń shaǵymyn qarap jatqan ákimshilik qyzmetkerleri jaýap berer dep oılaımyz.

Al, bizdiń biletinimz mynaý: qara tas qala syrtyna kóshse, qala ákimshiligi osy áreketimen tarıhqa qarsy qastandyq jasap, asharshylyq qurbandarynyń arýaǵyn kúńirentip, qazaq halqynyń qarǵysyna qalady jáne qoǵamnyń narazylyǵyna tap bolady. Sóıtip, qara tasqa qarsy shyqqan ákimshilik bolyp, tarıhqa enedi.

Sondyqtan, tarıhtyń aldynda qarabet bolýdan qala ákimshiligi saqtanady degen oıdamyz.

Úmittimiz!..

Tómende Almaty qalasynda ornalasqan jáne jastarǵa naǵyz teris áser beretin ári adam shoshyǵandy qoıyp, kórseń, qazaqqa qarsy jasaǵan qylmystarynan janyń túrshigetin sovettik tulǵalardyń eskertkishterin berip otyrmyz.

Mine, naq qala syrtyna shyǵarylatyn eskertkishter osylar.

Jáne bir sóz. Qala aýmaǵynda eskertkish ornatý máselesin qaraıtyn komısıa músheleri, eskertkishti búdjetke kirgizetin jaýapty memlekettik qyzmetkerlerdiń ata-babalary asharshylyq kórmegen bolýy múmkin nemese ol adamdar tarıhty jete bilmeýi de ǵajap emes. Sondyqtan qala boıynsha eskertkishter ornatý máselesin qaraıtyn, ony sheshetin, sheshim qabyldaıtyn ákimshilik qyzmetkerlerge rejıser Qalıla Omarovtyń 1931-1933 jyldardaǵy asharshylyq tarıhynan túsirgen «Náýbet» derekti fılmin arnaıy usynyp otyrmyz.

http://www.abai.kz/post/view?id=1419

Kórińizder, bálkim oılanarsyzdar.

Cizder, qara tastan qoryqpańyzdar! Qara tastan shyǵar ottan qorqyńyzdar...

Abai.kz