Túrkistan qalasyn Túrki áleminiń 2017 jylǵy mádenı astanasy bolýyna oraı qańtar aıynyń 23 kúni Ońtústik Qazaqstan oblysy ákimdiginde Ońtústik Qazaqstan oblysynyń ákimi Janseıit Túımebaev, TÚRKSOI uıymynyń Bas hatshysy Dúısen Qaseıinov jáne Mádenıet jáne sport mınıstrliginiń Mádenıet jáne óner isteri departamenti dırektorynyń mindetin atqarýshy Almaz Nurazhannyń «Túrkistan – Túrki áleminiń mádenı astanasy» aıasynda ótkiziletin is-sharalar josparyna úsh jaqty qol qoıý rásimi ótti. Bul týraly «Áziret Sultan» qoryq-mýzeıiniń baspasóz qyzmeti jazdy.

Aıta ketsek, naýryz aıynan bastap Túrkistan qalasynda  atalǵan sharanyń saltanatty ashylý rásimi ótedi.  Ulystyń uly kúni  - Naýryz toıy merekelenip, túrkitildes ulttar arasyndaǵy baýyrlastyq baılanystar men dostyqty, túrkilik mádenıet pen ónerdi urpaqtan urpaqqa jetkizip, ony álemge tanytý maqsatynda  túrli is-sharalar uıymdastyrylady.

Atalǵan jıyn aıaqtalǵasyn TÚRKSOI uıymynyń Bas hatshysy Dúısen Qaseıinov jáne Mádenıet jáne sport mınıstrliginiń Mádenıet jáne óner isteri departamenti dırektorynyń mindetin atqarýshy Almaz Nurazhan, Túrki áleminiń mádenı astanasy – Túrkistan jerine at basyn burdy. «Áziret Sultan» memlekettik tarıhı-mádenı qoryq-mýzeıiniń dırektory Jandos Áýbákir kelgen qonaqtarǵa mýzeı quramyndaǵy kóne tarıhı-mádenı eskertkishter jaıly qysqasha baıandap, «Túrkistan – Túrki áleminiń mádenı astanasy» aıasynda ótkiziletin is-sharalarǵa belsendi túrde atsalysatynyn jetkizdi.