2017 jylǵy 25 qańtarda Astanada 28-shi Dúnıejúzilik qysqy Ýnıversıada-2017 Alaýynyń Estafetasy ótedi.
Alaý estafetasy saǵat 11:00-de Nazarbaev Ýnıversıtetinen bastalyp, qala ákimdiginiń mańyndaǵy alańda aıaqtaldy. Alaýdy belsendi stýdentter men astanalyq sportshylar, barlyǵy 60 adam alyp ótti. Sonyń ishinde esimderi elge aıan Vasılıı Levıt, Madıar Ibraıymbekov, Móldir Mekenbaeva sıaqty sportshylar bar.
Estafeta 2 kezeńge bólindi. Ol Qabanbaı batyr dańǵyly - Dostyq k-si - Qonaev k-si - Baraev k-si - Respýblıka dańǵyly- Kenesary k-si syndy qalanyń ortalyq kóshelerimen ótti. Alaý estafetasynyń jalpy uzyndyǵy - 12 shaqyrymdy qurady.
Birinshi kezeń aıaqtalysymen «Báıterek» monýmentiniń aldynda turǵyndar men qala qonaqtaryna arnalǵan konserttik baǵdarlama qoıyldy.
Ekinshi kezeńde alaý respýblıkalyq shtab ókilderine tabystalyp, 2017 jylǵy 28-shi Dúnıejúzilik Ýnıversıadanyń ashylý saltanatyna qatysý úshin Astana-Almaty áýe reısimen ońtústik astanaǵa jóneltildi.
