SHQO-da prokýratýra qyzmetkeri Instagram jelisinde jyldamdyqty asyryp kele jatqany túsirilgen vıdeomen maqtandy. Qoldanýshylardyń aıtýynsha, jyldamdyqty asyrǵan prokýratýra qyzmetkeri túsken rolıkti Jelige Shyǵys Qazaqstan oblystyq prokýratýra qyzmetkerleriniń ózi júktegen, - dep habarlaıdy Tengrinews.kz tilshisi Avtomobılısterge járdemdesý (OSA) qoǵamynyń saıtyna silteme jasap.
Vıdeo Avtomobılısterge járdemdesý (OSA) qoǵamynyń saıtynda jarıalanǵan. "SHQO prokýratýrasynyń tergeýshisi Erkebulan Qudabaev Instagram jelisindegi paraqshasynda jyldamdyqty asyryp kele jatqany túsirilgen vıdeomen maqtanyp, paraqshasyna júktegen", - dep jazǵan qoldanýshy áleýmettik jelilerde jarıalanǵan rolıktiń sıpattamasyna.

Aıta keteıik, vıdeoda júrgizýshiniń tasjolda saǵatyna 220 shaqyrymmen kele jatqany kórinedi. Al vıdeodaǵy kelesi kadrlar Óskemen qalasynda túsirilgen. Onda da júrgizýshi jyldamdyqty asyryp, saǵatyna 90 shaqyrymmen kele jatady.

Biraq bul vıdeolardyń qashan túsirilgeni belgisiz.
Jyldamdyqty asyrǵan júrgizýshi túsirilgen vıdeo Jelide jarıalanǵan soń, Erkebulan Qudabaev Instagram jelisindegi paraqshasyna shekteý qoıdy. Al SHQO prokýratýrasyndaǵylar Tengrinews.kz tilshisine áleýmettik jelilerde taralyp jatqan vıdeo jaıly biletinderin aıtty.

"Qazir vıdeomaterıaldar zerttelip jatyr. Qyzmetkerge qatysty qandaı da bir naqty sheshim qabyldaýǵa áli erte. Tergeý júrgiziledi", - dedi SHQO prokýratýrasynyń baspasóz qyzmetindegiler.