Almaty qalasy Bostandyq aýdanynyń №2 sotynda ánshi Merýert Túsipbaeva men dızaıner Jadonyń isi boıynsha sot otyrysy ótti, - dep habarlaıdy Tengrinews.kz
Sot otyrysy sál kesh bastaldy. Hatshynyń aıtýynsha, barlyq sýdıa jınalysta bolǵan.
Eske sala keteıik, Jado men Merýert Túsipbaeva arasyndaǵy janjal 2016 jyldyń jeltoqsanynda shyqqan bolatyn. Dızaıner ánshiniń Instagram jelisindegi paraqshasynda jazǵanyna renjip, sotqa aryz túsirgen edi. Ol Merýert Túsipbaevany jala japty jáne aryn qorlaıtyn sózder aıtty dep aıyptap, 20 mıllıon teńge kóleminde moraldyq shyǵyn talap etken bolatyn.
Bul joly sot prosesine Merýert Túsipbaeva keldi. Biraq Jado men onyń advokaty sot otyrysy bolatyny jaıly estise de, sot zalyna kelmedi.
Sot prosesi aıaqtalǵan soń Merýert Túsipbaeva osy jaǵdaıǵa qatysty pikir bildirdi.
"Jaqynda ǵana Jadyra Sahıeva "Merýert Túsipbaeva meniń aıaǵyma jyǵylatyn bolsa da, ony keshirmeımin" dep suhbat bergen bolatyn. Menińshe, birinshiden, bul ádepsizdikke jatady. Men onyń aıaǵyna baryp jyǵylmaımyn. Meniń de ar-namysym bar, ul ósirip otyrmyn. Ulym meniń bireýdiń aıaǵyna jyǵylǵanymdy kórse ne bolady? Biz advokatymyzben onyń bul sózinde quıtyrqylyq bar ekenin sezip otyrmyz. Biz de aryz jazdyq. Sebebi, Jado meniń týystarymdy, anamdy "meni úsh jylǵa túrmege qamaımyn dep, aıaǵyma jyǵylsa da, keshirmeımin" dep, búkil el aldynda qorqytyp jatyr. Bizde adamdar zańdar jaıly asa bile bermeıdi. Olar qatty qorqyp, alańdap jatyr. Eki kún saıyn anama jedel járdem shaqyramyz. Egde jastaǵy áıel. Jaqynda gıpertonıalyq asqyný boldy. Sebebi, teledıdardan únemi meniń túrmege qamalýym múmkin ekeni jáne Jadonyń menen 20 mıllıon teńge óndirip almaqshy ekendigi jaıly aıtyp, kórsetip jatady. Menińshe, aıtqan sózderge abaı bolý kerek", - dedi Merýert Túsipbaeva.
Al ánshiniń advokaty Qolǵanat Qabanbaeva Jadonyń ústinen qandaı mándegi aryzdy jazǵandaryn túsindirip berdi.
"Biz aryzda onyń Merýert Túsipbaevanyń bedeli men iskerlik abyroıyn nuqsan keltirgenin kórsettik. Ol Merýertti balaǵattady. Telearnada sóz sóıledi. Ol osynda, ıaǵnı, sot otyrysyna kelgende Merýert Túsipbaevanyń ózi joq bolǵandyqtan, osyndaı mándegi suhbat berdi. "Merýert onyń aıaǵyna jyǵylyp, keshirim surasa da, ol ony keshirmeıdi" degen maǵynada suhbat beripti. Bizdiń oıymyzsha, Jado osy sózimen de balaǵattaýdy qoımady. Sodan biz mynadaı qorytyndyǵa kelip otyrmyz, ıaǵnı, sýdıalar Jadonyń aryzyn qoldaýy múmkin. Endi biz de Jado sıaqty odan 20 mıllıon teńge talap etemiz", - dedi advokat Qabanbaeva.
Sondaı-aq, advokat Merýert Túsipbaeva Jadony balaǵattaǵan joq dep esepteıtinin jáne nege bulaı oılaıtynyn aıtty.
"Men munda Merýert Túsipbaevanyń kinási joq dep oılaımyn. Jadonyń aryzyn negizsiz dep sanaımyn. Birinshiden, ol ózi telearnadaǵy baǵdarlamalardyń birinde Merýert Túsipbaevaǵa birinshi bolyp, til tıgize bastady. Ol "Merýerttiń talǵamy joq, kıim kıýdi bilmeıdi" dep Túsipbaevanyń ımıjine nuqsan keltirdi. Mundaı pikirlerdi tek lısenzıasy men dıplomy bar sarapshylar aıta alady. Sán sarapshysynyń ózi de mundaı sózderdi abaılap, mádenıetti túrde adamnyń ar-namysyna tımeı, durys aıtyp jetkizedi. Bul jaǵdaıda, menińshe, Jado Merýertti osylaı synǵa almaýy kerek edi. Al Merýert Jadonyń bul synyna qazaqtyń maqalymen jaýap berdi. Merýert maqaldy ózi qurastyryp alǵan joq: "It joqta shoshqa úredi" ("Kogda net sobakı, laet svıná"). Qazaqtar bul maqaldy aýyzeki stılde qoldana beredi. Ol balaǵat sóz bolyp sanalmaıdy. Sebebi, ol - qazaq halqynyń aýyzeki fólklordyq týyndysy", - dep túsindirdi Qabanbaeva.
Aıta keteıik, Merýer Túsipbaeva úsh sot otyrysyna da kelmegen. 10 qańtarda ótken sot prosesine ánshiniń advokaty ǵana kelgen. Onyń aıtýynsha, Túsipbaeva ol kezde Reseıge em alýǵa ketken.
Eger Merýert Túsipbaevanyń kinási dáleldense, ol 3000 AEK kóleminde (6 mıllıon teńgeden kóp) aıyppul tóleıdi nemese osy kólemde túzeý jumystaryna tartylady, nemese úsh jylǵa bas bostandyǵynan aıyrylady nemese shekteledi.
