Ózbekstan prezıdenti Shavkat Mırzıaev 25 qańtarda eldiń alǵashqy prezıdenti Islam Karımovty máńgi este qaldyrý týraly qaýly shyǵardy dep habarlaıdy Azattyq radıosy.

Qaýly boıynsha, Ózbekstanda birneshe mekeme men nysanǵa, onyń ishinde Tashkent memlekettik tehnıkalyq ýnıversıtetine, Asaktaǵy kólik qurastyrý zaýytyna, Ferǵanadaǵy Óner saraıyna, Tashkenttegi halyqaralyq áýejaıǵa, Qaraqalpaqstan, Tashkent pen birneshe qalalardaǵy ortalyq kóshelerge Karımovtyń esimi berilmek. Qujatta sonymen qatar Samarqanda Islam Karımov jerlengen jerge memorıaldy keshen turǵyzylatyny aıtylǵan.

Ótken jyldyń sońynda Ózbekstan bıligi Karımovke eskretkish turǵyzýǵa konkýrs jarıalanǵan. Onyń qorytyndysy boıynsha Tashkentte, Karımov týyp-ósken Samarqanda, Qashqadarıa oblysynyń jetekshisi bolyp qyzmet istegen Karshı qalasynda eskertkishter ornatylatyn bolǵan.

Mırzıaevtiń jańa qaýlysy boıynsha, Ózbekstanda jyl saıyn 30 qyrkúıekte Karımovtyń týǵan kúni toılanyp, 2 qyrkúıek Tuńǵysh prezıdentti eske alý kúni kúni dep jarıalanady. Ózbekstan bıligi memlekettik BAQ-ty Karımovty eske alýmen baılanysty sharalardan habar taratýǵa mindettedi.

Ózbekstandy 1989 jyldan beri 27 jylǵa jýyq ýaqyt basqarǵan Islam Karımov 79 jasynda qaıtys boldy. Onyń ólimi týraly alǵashqy habar 2016 jyly 29 tamyzda shyqty. Karımovtyń qaıtys bolǵany týraly resmı túrde 2 qyrkúıekte habarlandy. Karımovtyń óliminen soń prezıdent mindetin ýaqytsha sol kezdegi premer-mınıstr Shavkat Mırzıaev atqaryp, keıin ol prezıdent bolyp saılandy.