Elimizdegi rýhty jastar belgili qoǵam qaıratkeri Muhtar Shahanovty syrttaı qorǵaıtyn qupıa uıym quryp, onyń úıiniń aldynda kúndiz-túni qaraýyldaýǵa daıyn tur eken. Bul jaıynda ult janashyry óziniń Facebook áleýmettik jeilisindegi paraqshasynda jazady.

“Muha, bizdi bastańyz. 
Endi aıanatyn eshteńe qalǵan joq. Sońyńyzdan erdik”, – desken jastar kún saıyn top-top bop, jumysyma kele bastady. Olar tipti basyma tóne bastaǵan qaýip-qaterdi de aldyn ala eskerip, maǵan bildirtpeı, “Shahanovty qorǵaıtyn top” degen jasyryn uıym qurypty. Buryn saıasatqa aralaspaǵan deni taza, kózqarasy aıqyn, tileýles, rýhtas adamyna qoń etin oıyp berýge ázir turatyn mundaı jańa tolqynnyń bel alyp, bilek qosqany kóńilime edáýir úmit uıalatty.
Bir kúni túnde úsh-tórt saǵat qaǵazǵa shuqshıyp otyrǵandyqtan, on-on bes mınýt boı jazyp keleıin dep syrtqa shyqsam, arqamnan esik aldynda turǵan eki jigit ilese júrdi. Ońǵa burylsam – ońǵa, solǵa burylsam – solǵa, toqtasam – toqtaıdy. Kóńilime yńǵaısyz kúdik endi. Jurt ary-beri júrip jatqan, elektr jaryǵy bar jerge shyǵyp, álgilerden qalaı qutylýdyń jolyn oılap turǵanymda, olar qasyma kelip, qol berip amandasty da: “Bizden qaýiptenbeńiz. Biz sizdiń qoǵamdyq qorǵaýshylaryńyzbyz”, – dedi.
– Eger keıbir túnderi syrtqa, serýenge shyqpaı, úıimde uıyqtap jatsam da sender meni esik aldynda kúzetip tura beresińder me? – dep suraǵanymda, álgi jigitterdiń biri:
– Biz úlken toppyz. Kezektesip kúzetemiz. Sizdiń aman-saý júrýińiz ult úshin qajet, – dedi.
Az-kem únsizdikten soń ekinshi jigit qasyma kelip:
– Aǵa, quttyqtaımyz. Esittińiz be, esitpedińiz be? Búgin siz sportsmenderdiń úlken jıynynda Respýblıka kıkboksıńteriniń prezıdenti bop saılandyńyz! – dep qolymdy qysty.
– Túsinbedim, bul ázilderiń be, shyndaryń ba? – dedim men tańdanyp. – Men ómirimde bir kún sportpen shuǵyldanbaǵan pendemin. Baıqaýsyzda bireý sál ıterip jiberse qulaǵaly turǵan adam qalaı respýblıka kıkboksıńiniń prezıdenti bola alady? Bularyń anekdottyń anekdoty ǵoı...
– Biz sizdiń sportpen shuǵyldanbaǵanyńyzdy da, qara kúsh jaǵynan tym álsiz ekenińizdi de jaqsy bilemiz, – dedi álgi jigit jymıyp. – Biraq, siz elimizdegi rýhy kúshti sanaýly adamdardyń birisiz. Sol úshin de bıliktegi keıbireýler sizdiń kózińizdi joıǵysy keledi. Qazirgi tańda Jeltoqsan shyndyǵyn ashýda sizden batyl, sizden yńǵaıly adam joqtyń qasy. Mine, sondyqtan da, Shahanov jalǵyz emes, ol – respýblıka kıkboksıńtarynyń prezıdenti, onyń arqasynda qaptaǵan kúsh ıeleri tur. “Kim de kim oǵan qarsy qol kóterer bolsa úlken qasiretke jolyǵady” degen oıdy sezdirý úshin biz sizdi kıkboksıńterdiń prezıdenti etip syrtyńyzdan saılap jiberdik. Mundaı erkindigimizge sizden keshirim suraımyz. Biraq, bul ıdeıany usynǵan inińiz, belgili kıkboksıń chempıony – Sabyrjan Mahmetov. Ol erteń sizge ózi baryp jolyǵady.
O toba, oıym túgili túsime kirmegen, osyndaı kútpegen oqıǵaǵa jolyǵamyn dep kim oılaǵan", - deıdi zıaly qaýym ókili.