Qazaqstandyq dzúdoshy Eldos Smetov halyqaralyq dzúdo federasıasy reıtıńinde 60 kılogramm salmaq dárejesi boıynsha birinshi orynǵa shyqty.Qazaqstandyq dzúdoshy Eldos Smetov halyqaralyq dzúdo federasıasy reıtıńinde 60 kılogramm salmaq dárejesi boıynsha birinshi orynǵa shyqty. 

Bul týraly Azattyq habarlaıdy.

Halyqaralyq dzúdo federasıasy (IJF) reıtıńi 2017 jyly qańtardyń 23-i kúni jarıalandy. Álemdik reıtıńti 1852 upaımen qazaqstandyq atlet Eldos Smetov bastap tur. Úzdik úshtikke ózbekstandyq Dıorbek Ýrozboev (1772 upaı) pen ázerbaıjandyq Orhan Safarov (1772 upaı) engen. Al Rıo olımpıadasynyń fınalynda Smetovti jeńgen reseılik Beslan Mýdranov 1573 upaımen 6-orynda tur. Álemdik reıtıńte sportshylardyń 2015-2016 jylǵy jarystarda jınaǵan upaılary esepteledi.

24 jastaǵy Eldos Smetov dzúdo seksıasyna bes jasynda barǵan. Ákesi Baqtybaı onyń toǵyz jastan asqanda sporttan qol úzip kete jazdaǵanyn aıtady.

- Toǵyz jasynda Eldos aýylda oınap júrgende qulap, basyn jaryp aldy. Kóp emdeldi. Sportty oılaıtyn jaǵdaıymyz bolmady. Keıin táýir bolǵan soń kúreske qaıta keldi, - deıdi ákesi Baqtybaı.

Smetov 16 jasynda, 2009 jyly jasóspirimder arasyndaǵy Qazaqstan chempıonatynda jeńiske jetip, Qazaqstan jastar quramasyna shaqyrtý alady. 2010 jyly Marokkoda ótken jasóspirimder arasyndaǵy álem chempıonatynda - altyn, 2011 jyly Ońtústik Afrıka Respýblıkasynda ótken jasóspirimder arasyndaǵy álem birinshiliginde qola medal alady. Osy jeńisten keıin 20 jasynda bapkerler ony eresekter arasyndaǵy jarysqa apara bastaıdy.

AZIADADAǴY ALTYN

2013 jyly Eldos Smetov Taıland astanasy Bangkokta ótken eresekter arasyndaǵy Azıa chempıonatynda qola júlde ıelenedi. Al 2014 jyly Inchhonda (Ońtústik Koreıa) ótken Azıa oıyndarynda Smetov chempıon atanady. Ol fınalda 2013 jylǵy álem chempıony, mońǵolıalyq palýan Ganbat Boldbaatardy ıpponmen (taza jeńis) jeńdi. Buǵan deıin Qazaqstan dzúdodan Azıada jarystarynda altyn medal almaǵan edi.

- 2013 jyly Chelábınskide ótken álem chempıonatyna barmadym. Azıa oıyndarynda altyn alǵym keldi, bapkerlerdiń basty maqsaty da osy boldy, - deıdi dzúdoshy.

Smetov 2015 jyly Astanada ótken álem chempıonatynda altyn júlde aldy. Ol fınalda komandalas dosy Rýstem Ibraevpen kezdesip, shıdo (bir upaı) ádisimen basym tústi. Astanadaǵy jeńisten keıin Smetov «Azıa oıyndarynda jeńiske jettim. Senim kóbeıdi. Endi Azıa chempıonaty men olımpıadada altyn alsam» degen tilegin aıtqan.

2016 jyly balýan Tashkentte ótken Azıa chempıonatyna barady. Bul jarysta ol tórt kezdesý ótkizip, barlyǵynda taza jeńiske jetti. Fınalda Smetov ózbekstandyq Ýrozbek Dıorbekovten eskertý sany boıynsha jeńilip jatyp, kezdesý aıaqtalýyna 30 sekýnd qalǵanda, qarsylasyn qolynan tartyp, aýyrtý ádisimen jeńiske jetti. Ózbekstan balýany aıaqtarymen tatamıdi soǵyp, jeńilgeni týraly ıshara bildirdi.

«OLIMPIADA ALTYNY JETPEI TUR»

Rıo-2016 olımpıadasy aldynda IJF Smetovti chempıon ataǵyna úmitker dep baǵalady. Smetov Rıo tatamıinde fınalǵa deıin barlyq qarsylastaryn taza jeńip, tek fınalda reseılik Beslan Mýdranovtan jartylaı jeńilip, kúmis medal ıelendi.

Rıoǵa fızıkalyq, psıhologıalyq, tehnıkalyq jaǵynan daıyn bolyp bardym. Fınalda sáttilik jetispedi. Olımpıada kúmisi – kareramdaǵy basty jetistigim. Eger Rıoda altyn alsam kareramdy aıaqtaıtyn edim. Qazir medaldarymnyń arasynda olımpıadanyń altyny joq. Demek, ol medaldy alý úshin Tokıo olımpıadasyna daıyndalamyn, - deıdi balýan.

Al Qazaqstan quramasynyń bas bapkeri Ermek Imanbekov Rıo olımpıadasynan keıin Azattyq tilshisine bergen suhbatynda «Smetovten altyn kúttik. Maqsat Rıo altyny bolǵan. Fınalda ony ishki emosıasy jeńip ketti. Smetovte taktıka, tehnıka bar. Jyǵylyp bara jatyp, arqasyn tatamıge tıgizbeı qashyp kete alady. Smetovti Tokıo olımpıadasyna deıin saqtap, altynǵa jumys isteımiz» degen edi.

Eldos Smetov qazir Qazaqstan quramasymen Tokıoda oqý-jattyǵý jıynynda júr. Al aqpannyń 24-i Dússeldorfta (Germanıa) ótetin Gran-prı jarysyna barady. Smetov bıyl kúzde ótetin Býdapeshtegi (Vengrıa) álem chempıonatyna da qatysýdy josparlap otyr.