Kóktem merekesin qytaılyqtar otbasymen birge qarsy alý myzǵymas dástúrge aınalǵan dep habarlaıdy 24.kz. Dál osy ýaqytta ata-analary men týysqandary jastardy suraqtyń astyna alyp, tezirek otbasyly bolýyn tileıdi. Al bul elde turmys qurmaǵan qyzdar sany jyldan jylǵa artyp keledi. Boıjetkender sońǵy jyldary týǵan-týystyń sózinen qashyp, mereke kúnderi ózine serik bolatyn jigitterdi jaldap alatyn bolǵan. Jaldanbaly «kúıeý balalar» túrli áleýmettik jelide ózderin jarnamalap álek. Jeke derekke boıyn, salmaǵyn, jumys ornyn kórsetip, tipti qyzdyń ata-anasy úılený týraly qandaı suraq qoısa da, jaýap berýge daıyn ekenderin ashyq jazady. Chjaý Iýbo kóktem merekesinde úıine qaıtpaı, Beıjińde qaldy. Boıjetkender tarapynan suranys bar kezde jaldanyp, qosymsha tabysqa kenelsem deıdi. Sháı satyp, kúnin kórip júrgen bozbalanyń qazir telefonyna tynym joq. Bizben suhbattasý kezinde birneshe qyz habarlasyp úlgerdi.
Chjaý Iýbo, Beıjiń qalasynyń turǵyny: -
– Úıge qaıtqan soń, bir jyldyq jańalyqtarymen bólisý kerek qoı. Al úlkender jaǵy qashanǵy osylaı júresiń, turmys quratyn ýaqytyń jetti dep jan-jaqtan psıhologıalyq qysym jasaıdy. Osy suraqtan jeńil qutylý úshin boıjetkender ýaqytsha «jigit» jaldaýǵa májbúr.
Qytaıdyń QQ áleýmettik jelisinde jaldamaly «boıfrend»-ti bir táýlikke jalǵa alý 600-den 1000 ıýánǵa baǵalansa, mereke kúnderi 1000-1500 ıýánǵa deıin qymbattaıdy. Ary-beri júrgen jolaqysy men basqa da shyǵyndy qyz kóteredi. Oıy men boıy boıjetken talabyna saı bolsa, kelisimshartqa otyrady. Týystary seziktenip qalmas úshin erterek kezdesip, ne aıtatyndaryn aqyldasyp alady.
Lı Sýeıxýa, Beıjiń qalasynyń turǵyny:
– Meniń oıymsha basy bos jastarǵa tamasha múmkindik. Zaman talabynan týyndaǵan kásiptiń jańa túri sıaqty. Jasy kelgen qyzdar úıine barǵanda týystary tarapynan jeke ómirine qatysty yńǵaısyz áńgimeden qutylý úshin osyndaı qadamǵa barady. Ádepti buzbaı, zań sheńberinen shyǵyp ketpese, munyń esh ábestigi joq.
Van Tán, Beıjiń qalasynyń turǵyny:
– Ózin ýaqytsha jalǵa berip, ózgeni aldaýǵa qarsymyn. Kez kelgen ata-ana balasyn tezirek otbasyly bolǵanyn qalaıdy. Alaıda ata-anany bulaı aldaý durys emes. China news jazýy boıynsha, ádette qaıyn jurtymen tanysýǵa barǵan «kúıeý bala» bólek bólmede jatady. Bul kelisim boıynsha ról oınap júrgen jastarǵa óte yńǵaıly. Jigitterdi ýaqyttsha serik etip jalǵa alý zańǵa qaıshy emes. Biraq zańgerler bul árekettiń sońy keleńsiz jaǵdaıǵa ákelýi múmkin ekenin eskertedi. Al ony mundaı jaǵdaıda dáleldeý qıynǵa soǵady.
Avtor: Nurbek Beken
