22 qańtar kúni «Qamshy» portalynda Shyǵys Qazaqstan oblystyq máslıhatynyń hatshysy Golovatúk Vladımır Mıhaılovıchtiń Reseıdiń de azamaty bolýy múmkin ekeni týraly dabyl kótergen maqala shyqqan bolatyn.

«SHYǴYS QAZAQSTAN OBLYSY RESEI AZAMATYNYŃ QOLASTYNDA MA?» atty maqalada Reseı Federasıasy Federaldyq mıgrasıalyq qyzetiniń elekrondy bazasynan kóshirilgen tárizdi qujat ta bar bolatyn. Onda V. M. Golovatúktyń 1998 jyldan bastap kórshi elge jylyna birneshe ret baratyny kórsetilgen. Dál osy qaǵazda 1998 jyldyń 12 tamyzynda V.M.Golovatúkke Reseı azamattyǵyn berý týraly sheshim qabyldanǵany jazylǵan. SHQO oblystyq máslıhaty hatshysynyń Reseı azamaty retindegi jeke is-qujatynyń nómiri de anyqtalǵan – 170309960.

Sol málimetke sensek, 1998 jyldyń 12 tamyzynda Golovatúk Vladımır Mıhaılovıch esimdi azamat Reseı Federasıasynyń «Azamattyq týraly» zańynyń 3 babynyń negizinde Astanadaǵy Reseı elshiliginiń konsýldyǵynda Reseı azamattyǵyn alady. Tıisinshe pasport rásimdemegen, tek ózge eldiń azamattyǵyn alǵan, sóıte tura Qazaqstan azamattyǵynan bas tartpaǵan.

Atalǵan maqaladan soń «Qamshy» poshtasyna Oblys ákimdiginen hat keldi. Onda V. M. Golovatúk týraly faktiler tekseriletini jazylǵan.

«Shyǵys Qazaqstan oblystyq máslıhatynyń hatshysy V.M. Golovatúkte Qazaqstan Respýblıkasy men Reseı Federasıasynyń qos azamattyǵy bar bolýy týraly qazaqstandyq Internet-resýrstarda ornalastyrylǵan aqparat boıynsha 2017 jyldyń 25 qańtarynda oblys ákimdiginde óńirdiń quqyq qorǵaý organdarynyń qatysýymen keńes ótip, onda atalmysh másele boıynsha burynǵy jumys týraly aqparat tyńdaldy.

Keńestiń qorytyndysy boıynsha kórsetilgen faktilerdi tekserýdi jalǵastyrý týraly sheshim qabyldandy», - delingen Shyǵys Qazaqstan oblysy ákiminiń baspasóz qyzmeti jibergen málimdemede.