2008 jyldan bastap árbir eki jylda ortalyq Vengrıanyń Býgas qalasynda ótkizilip kele jatqan quryltaı kezekti ret bıylǵy jyldyń 7-10 tamyzynda ótti. Bıyl 160 myńnan astam adam qatysty. Onyń ishinde 10 myńy sheteldik qonaqtar. Atalmysh quryltaı negizinen kóne dástúrlerdiń saqtalý, ejelgi majarlyq jáne ózge de kóshpendi dala mádenıetteriniń qaıta jańarý saltanaty, uly ata-babalardy eske alý toıy retinde ótkizilip keledi. Búgingi kúni Quryltaı majarlyq dástúrlerdi saqtaý maqsatynda uıymdastyrylatyn eń iri is-sharalardyń biri. Ol majarlyqtarǵa tarıhı jáne mádenı baılanystar arqyly týys bolyp sanalatyn kóptegen shyǵys halyqtaryna óz qushaǵyn qýana jaıady. Olar óz tarıhyn tek jatqa ǵana bilip qoımaı, onymen maqtanyp, úlgi tutady. Elde tarıhı qarý jaraqtar men jabdyqtardy jasaıtyn eki ónerkásip zaýydtary jáne júzdegen sheberhanalar jumys isteıdi. 2012 jyly Venger delegasıasy ata-balalarynyń rýhyna taǵzym etip, búgingi kúni Mádıardyń urpaqtary turatyn Qostanaı oblysynyń Jángeldi aýdanynyń Saǵa aýylyna «Ómir aǵashy «Báıterek»» monýmentin ornatqan.
Quryltaıǵa qatysýshylardyń kóbisi ózin turandyq, ıaǵnı kóshpendilerdiń urpaǵy retinde tanytady ulttyq naqyshtaǵy kıim men jabdyqtarda boldy. Turan halyqtary quryltaıynyń ózge quryltaılardan basty ereksheligi túrki halyqtarynyń basyn qosýdy kózdeıtindiginde. Qazaqstannyń bul Quryltaıǵa qatysýshylar Opýster Ulttyq tarıhı memorıaldyq parki ishindegi saıahatqa qatysyp, Býgas qalasynyń mańynda «Attıla» kıiz úıiniń ashylý saltanatyn, «Shyǵys quıyny» shaıqasynyń kórsetilimin, Quryltaıdyń konserttik jáne at ústindegi sport baǵdarlamalaryn tamashalady. Sonymen qatar Qazaqstan Respýblıkasynyń Vengrıadaǵy elshiliginiń uıymdastyrýymen Býdapeshtte "Varosliget" saıabaǵyndaǵy Astana kóshesinde ornalasqan Abaı Qunanbaıulynyń músinine gúl shoǵyn qoıdy. Baq.kz saıty atalmysh quryltaı týraly tolyqtaı jazyp fotobaıan jarıalady. Turan halyqtary quryltaıynan foto estelikterdi nazarlaryńyzǵa usynamyz.
Qamshy-aqparat
