Bul týraly Caravan.kz medıa-portaly habarlady.

Amangeldi Batyrbekovtyń mundaı sharasyzdyqqa barýyna synı maqalalary úshin bir jylda úsh márte sottalyp, úsh márte aqtalýy jáne qýdalaýǵa túsýi sebep bolyp otyr.

Japa shekken jýrnalısiń aıtýynsha, oqıǵa 2015 jyly 9 qańtar kúni oblys prokýrory general Ibrahım Imanov jaıly «Generalǵa eki sóıleýge bola ma nemese aı-ǵasyr daýyna qaı ǵasyrda núkte qoıyldy?» degen maqaladan bastalypty. Birshama ýaqyttan soń tilshi «Ádilet» gazetine «Zańnan da, qudaıdan da nemese jazyqsyzdardyń jan aıqaıy Bas prokýratýraǵa jete me?» degen maqala jazady. Onda qaraqshylyq qylmysy boıynsha sottalyp ketken eki adamǵa arasha izdegen.

Osy maqaladan soń Saryǵash aýdany prokýrorynyń orynbasary Saparov jýrnalıs ózine jala japty dep sotqa aryzdanady. Áıtsede Amangeldi Batyrbekovtyń aıtýynsha, Saparov prokýror retinde ishki ister organyna shaǵym túsirýi tıis edi. Biraq ol Nurlan Saılaýuly retinde sotqa jeke shaǵym túsirgen. Saryǵash aýdandyq sotynyń sýdıasy Berik Qaıypov ony negizge almastan 1 jyl 6 aıǵa sottapty. Biraq úsh aıdan keıin apelásıalyq sot ol úkimdi buzyp, Batyrbekovty aqtap, sot zalynan bosatady. Al prokýrordyń is-qujattaryn oblystyq ishki ister departamentine jumsaıdy.

Munymen shektelmegen Batyrbekov bir aıdan soń taǵy bir maqalasy boıynsha "jala japty" degen aıyppen ekinshi márte 2 jylǵa sottalǵan. Úkimdi taǵy da birinshi isti qaraǵan sýdıa Berik Qaıypov shyǵarady.

«Siz isti qaraýǵa quqyńyz joq. Bir márte meni zańsyz sottadyńyz, degen qarsylyǵyma qaraǵan joq»,- deıdi A. Batyrbek

Biraq kóp uzamaı tilshi qarsy aryz negizinde qaıtadan aqtalady.

Áıtsede birinshi istegi prokýror Nurlan Saparovtyń aryzy boıynsha qaıtadan tergeý bastalyp, taǵy da úsh kúnge qamalady. Artynsha alty aı úıqamaqta otyrady. Sotta eki bap boıynsha aıyp taǵylady. Degenmen, sot prosesi barysynda QR Qylmystyq kodeksiniń 419-baby boıynsha taǵylǵan aıyp dáleldenbegendikten tolyq aqtalyp shyqty. Al 411-bap boıynsha taǵylǵan aıyptan jartylaı aqtalady. 

Bir jylda úsh márte sottalyp, úsh márte aqtalyp shyqqan Amangeldi Batyrbekov erteń Astanada baspasóz máslıhatyn ótkizbekshi. Al 1-aqpan kúni elimizdiń Bas prokýratýrasynda qabyldaýda bolýy tıis.

«Olar únemi qabyldaýdan bas tartyp kele jatyr. Bul joly taǵy bas tartsa óz ózimdi órteımin» deıdi Amangeldi Batyrbekov.