Elbasy Qazaqstan halqyna Joldaýynda Úkimet pen Ulttyq qaýipsizdik komıtetine «Qazaqstan kıberqalqany» júıesin qalyptastyrý sharalaryn qabyldaýdy tapsyrdy. Prezıdenttiń aıtýynsha, kıberqylmyspen kúrestiń ózektiligi barǵan saıyn arta túsýde.
«Qaýipsizdik ahýaly qýatty jáne áreket ete alatyn memlekettiń ólshemine aınalyp keledi. Qazirgi zamanda adamzat terorızmniń beleń alýymen betpe-bet kelip otyr. Bul rette destrýktıvti kúshterdi qarjylandyratyndarǵa, sheteldik terorıstik uıymdarmen baılanys jasaıtyndarǵa qarsy kúres júrgizý isi negizgi másele bolyp sanalady», — delingen Joldaýda.
Munymen qatar, dinı ekstremızmdi nasıhattaýdyń aldyn alý, ásirese ınternet pen áleýmettik jelide onyń jolyn kesý jumysyn júrgizý kerek ekeni aıtylady. «Qoǵamda, ásirese, dinı qarym-qatynas salasyndaǵy radıkaldy kózqarasqa baılanysty kez kelgen áreketke «múlde tózbeýshilikti» qalyptastyrý kerek. Bas bostandyǵynan aıyrý oryndarynda sottalǵandardy teologıalyq turǵydan saýattandyrý qyzmetteriniń maqsatty jumysy uıymdastyrylýǵa tıis. Óskeleń urpaqty rýhanı-adamgershilik rýhynda tárbıeleý úshin qosymsha qadamdar jasaý kerek», — dedi Elbasy. Sonymen qatar ol bul iske memlekettik emes sektordy jáne dinı birlestikterdi belsendi túrde tartý qajet ekenin aıtty.
Osy sharanyń barlyǵy Elbasynyń tapsyrmasy boıynsha ázirlenip jatqan, 2017-2020 jyldarǵa arnalǵan Dinı ekstremızm men terorızmge qarsy áreket jónindegi memlekettik baǵdarlamada eskerilýi kerek.
