Vıtas "Opera №2" kompozısıasyn oryndaǵan Dımash Qudaıbergenovke shaǵym aıta almaıdy. Bul pikirdi Tengrinews.kz tilshisine avtorlyq quqyqtar jónindegi sarapshy Temirlan Tólegenov aıtyp otyr.
Aıta keteıik, keshe reseılik ánshi Vıtastyń ániniń qytaı telearnasynda oryndalǵany úshin aryz túsirgeni belgili bolǵan edi. Qytaı BAQ-tary reseılik ánshiniń I am a Singer mýzykalyq baıqaýyn kórsetken Hunan TV arnasynyń ústinen aryzdanǵanyn jazǵan. Ánshi qazaqstandyq Dımash Qudaıbergenovtiń "Opera №2" ánin oryndaǵanyna narazy bolǵan. Ol endi qalamaqy talap etip otyr eken.
Al óz kezeginde Dımash Qudaıbergenovtiń PR-menedjeri Alpamys Sharımov buǵan qatysty pikir bildirmeıtinin, alaıda Vıtastyń shaǵymy telearnaǵa túsirilgenin aıtty.
Avtorlyq quqyqtar jónindegi sarapshy Temirlan Tólegenov bolsa Vıtas óz ánderiniń baıqaýlarda oryndalýyna tyıym sala almaıdy degen pikirde.
"Ádette konkýrstarda mundaı tyıymnyń kúshi joq. Sondyqtan konkýrstarda kez kelgen ándi oryndaı berýge bolady. Alaıda mundaǵy másele quqyqty kimniń qorǵaıtynynda bolyp otyr. Máselen, belgili bir fılm túsirgińiz keldi delik. Oǵan áýen tańdaǵanda avtorynan ruqsat surap, syıaqysyn tóleısiz - bul avtorlyq quqyqtyń saqtalýy. Oǵan belgili mýzykanyń jarnamada qoldanylýy da jatady. Ádette, meniń bilýimshe, SuperStar.kz sıaqty baıqaýlarda lısenzıalaryna sáıkes, ne mýzykalyq baspalarmen, ne avtorlyq uıymdarmen kelisim jasalady. Osy mýzykalyq materıal quqyq ıelerine tólem jasalǵannan keıin berilýi qajet. Sondyqtan, meniń bilýimshe, bul konkýrstardyń qarapaıym prosedýrasy", - deıdi Tólegenov.
Sonymen qatar, onyń aıtýynsha, baıqaýlarda mýzykalyq prodúserler qatysýshylarǵa án tańdaýǵa jáne oryndaýǵa kómektesedi, sebebi komanda reıtıń úshin jumys isteıdi. Baıqaýǵa qatysýshy oryndaıtyn ánin ózi tańdaı bermeıdi. Alaıda, aıtýynsha, Vıtas Dımash Qudaıbergenovke ánderin aıtýǵa ruqsat bermeı qoıýy múmkin eken.
"Ol jeke ánshiliginde óz ánderin oryndaýǵa ruqsat bermeýi múmkin, óz kompozısıalary bar ánjınaq shyǵarýyna qarsy bolýy múmkin. Biraq baıqaýǵa qatysýshy retinde oǵan shaǵym túsire almaıdy. Shaǵymdanǵysy kelse, Dımashqa emes, konkýrsqa shaǵymdana alady", - dedi maman.
Sondaı-aq, Tólegenovtiń aıtýynsha, avtorlyq quqyqty qorǵaý týraly shaǵymdar ádette sotqa jete bermeıdi. Shaǵymdanýshylar talaptaryn jáne zańsyz qoldanylǵan mýzyka úshin syıaqy somasyn ataıdy. Al mundaı jaǵdaıda jaýap berýshiler syıaqyny tólep berýge kelisim beredi.
Aıta keteıik, Dımash Qudaıbergenov 28 qańtarda Qytaıda ótip jatqan I Am a Singer mýzykalyq konkýrsynyń ekinshi kezeńinde de jeńimpaz atanǵan bolatyn. Ánshi reseılik ataqty Vıtastyń "Opera 2" atty týyndysyn oryndaǵan edi. Vıdeony myna jerden kórýge bolady.
