QR halyq ártisi, QR Memlekettik syılyǵynyń laýreaty Lakı Kesoglý "Opera №2" ánin Vıtas pen Dımash Qudaıbergenovtiń oryndaýlaryn salystyrdy, - dep habarlaıdy Tengrinews.kz tilshisi.
Halqy ártisi Dımashtyń daýsy mýzyka tilinde qalaı atalatynyn aıtty. "Dımashtyń daýsy sırek. Onyń daýys túri tenor áltıno nemese kontrtenor dep atalady. Ol klasıka janrynda damı alady. Biraq ol muny qalamaıdy. Álemde kontrtenorlar saýsaqpen sanarlyq. Olar tanymal emes, biraq bar. Bul óte sırek kezdesetin daýystar. Ol óte jas, 22 jasta osyndaı zor jetistikke jetip otyr. Ony Vıtaspen salystyrýdyń qajeti joq, men sizge resmı málimdeme jasaı alamyn - Vıtastyń múmkinshiligi Dımashtyń daýsynyń janynda túk te emes", - dep málimdedi ol.
Aıtýynsha, bul Dımashtyń tabıǵı daýsy. "Ol joǵary tenor notalarynda da aıta alady, biraq ol óziniń qalypty daýsymen de án shyrqaıdy, onysy jaǵymdy estiledi. Meniń bilýimshe, ol Aqtóbe mýzykalyq ýchılıshesin klasık retinde oqyp shyqty, ol jaqta estradany oqytpaıdy. Sondyqtan, búginde Dımash kósh basyndaǵy ánshimiz. Onyń qasyna eshkimdi de qoıýǵa bolmaıdy. Qalǵan juldyzsymaq ánshiler onyń mańyna da jaqyndaı almaıdy. Al onyń Vıtaspen salystyrý bilimsizdikten. Vıtasty tyńdap kórińizder, ol óz daýsymen aıtqanda arǵy jaǵynda eshteńeniń joq ekenin baıqaısyz. Onyń daýsy fálset, damyǵan fálset qana, osy múmkindigin qoldanyp qana júr. Taıaýda Vıtastyń prodúseri ánderin aıtýǵa tyıym saldy dep estidim, bul degenińiz olar básekelestikten qorqyp otyr degen sóz. Al menińshe, bul konkýrsta Dımash jeńimpaz atanady", - dep boljady ártis.
Onyń aıtýynsha, qytaılyq baıqaýda dybys rejıserleri eshqandaı da sıqyr jasap otyrǵan joq. "Dımashtyń dıapazony tórt oktavaǵa keń. Odan da joǵary bolmasa. Kásip ıesi retinde aıtaıyn, bizde daryndy, mýzykalyq daryny bar degen termın bar. Adam án salǵanda ol jaıly "janymen aıtty", "jylýy seziledi" dep jatamyz. Bul mýzykaldyq dep atalady. Bul qasıet barlyǵynda bar deý qıyn. Iaǵnı adamnyń daýys múmkinshilikteri kóp bolýy múmkin, biraq ony tyńdap kórseń, bos bolyp shyǵady. Al Dımashta barlyǵy da bar, 22 jasynda sahnaǵa daıyndyqpen shyǵyp dúr. Iaǵnı ne jaıly án aıtyp jatqanyn biletin ánshi. Bul óte qundy", - dedi ol.
Kesoglý Qudaıbergenovti burynnan biletinin, shyǵarmashylyǵyn sholyp júrgenin de aıtyp otyr.
"Men Dımashty burynnan bilemin, jarylys jasaıtynyn kútip júrmin. Birneshe jyl buryn Astanada túrli konsertterge qatystym, sol kezde ol da bolǵan. Sol ýaqytta-aq oǵan nazar aýdardym. Keıin konsertterdiń birinde áńgimelestim. Suhbattarymnyń birinde Dımash Qudaıbergenov degen jas jigittiń baryn, onyń "Slaván bazarynda" naǵyz dúmpý týǵyzǵanyn aıtqanmyn. Bul degen keremet jetistik qoı. Ánshilerimizdiń bireýi de "Slaván bazarynda" bas júlde almaǵan. Al bizde bul jaǵdaı nazarsyz qaldy. Menińshe, ádiletsizdik", - deıdi Lakı Kesoglý.
"Sońǵy ret 9-ynda Astanadaǵy konsertte án aıttym, ol da boldy. Grım bólmesinde áńgimeleskenimizde ol Qytaıǵa bara jatqanyn aıtty. Biraq sol kezde qandaı konkýrs ekenin bilmedim, endi mine, estip jatyrmyn, Youtube hostınginen kórdim, dál osyndaı jaǵdaı bolýy kerek edi dep oılaǵan edim. Ol óte daryndy. Tabıǵatynan, qudaıdyń bergen daryny, vokaly erekshe, mundaı daýys sırek kezdesedi. Eń bastysy ol maqsatyna berik, ánmen ómir súredi, mamandyǵyn súıedi", - dep qorytty sózin Lakı Kesoglý.
Aıta keteıik, Dımash Qudaıbergenov 28 qańtarda Qytaıda ótip jatqan I Am a Singer mýzykalyq konkýrsynyń ekinshi kezeńinde de jeńimpaz atanǵan bolatyn. Ánshi reseılik ataqty Vıtastyń "Opera 2" atty týyndysyn oryndaǵan edi. Vıdeony myna jerden kórýge bolady.
