Shymkent qalasynyń ákimi jalqaý jáne topas polıseılerdi jumystan shyǵaratynyn aıtyp, synady, - dep habarlaıdy Tengrinews.kz
Shymkent qalasynyń tórt aýdanynyń jergilikti polısıa qyzmetiniń basshylary sóz estidi. Ǵabıdolla Ábdirahymov polısıa basshylaryn esep berý úshin jáne kórsetkish úshin jumys istep júrgenderin aıtty.
"Men keıbir jergilikti polısıa qyzmetiniń basshylary ornynda qalatynyna senimdi emespin. Men aýdandyq jergilikti polısıa bólimsheleriniń jumysyna qanaǵattanbaımyn. Esep berý úshin ǵana jumys istep júrsizder. Sizder turǵyndardan emes, İİM-nen qorqasyzdar. Al, polısıa turǵyndar úshin jumys isteýi qajet! Eń basty baǵany ákim emes, basqa bir bastyqtar emes, turǵyndar beredi. Eger qyzmetkerler jumysyn durys isteı almasa, jumystan bosatý qajet. Jalqaý jáne qolynan is kelmeıtinderge polısıada oryn joq. Bul degenimiz úlken mindet, polısıaǵa adamdar óziniń áleýmettik statýsyn joǵarylatý úshin emes, tártip ornatý úshin kelýi tıis", - dep shúılikti Shymkent ákimi.
Ǵabıdolla Ábdirahymovtyń oıynsha, qala aýdandarynda jabaıy saýda, taksı júrgizýshileri, táýlikke jalǵa beriletin páterler jáne bos qalǵan qurylys alańdarymen jumys álsiz túrde júrgizilip keledi.
Sonymen qatar, qala ákimi, temeki tuqylyn qaıda bolsa, sonda tastap júre beretin adamdarmen kúresti kúsheıtý kerektigin aıtty.
"Kóptegen quqyqbuzýshylyq bizdiń jumysty tolyq atqarmaı jatqanymyzdan bolyp jatyr. Nege temeki tuqylyn tastaısyń? Sebebi qoqys jáshikteri joq. Jaǵalaýlarda nege qoqys kóp? Sebebi qoqys konteınerleri joq, al ózimen birge qoqysty qapqa salyp alyp ketýdi kóbisi oılana bermeıdi", - dedi Ǵabıdolla Ábdirahymov.
Qala ákimi osy máselelerdi sheshýge polıseıler men komýnaldyq qyzmet mamandaryna bir aı ýaqyt berdi. Osyǵan qaramastan, ákim qaladaǵy jergilikti polısıa qyzmetiniń jumysyna jaqsy baǵa berdi. Qala boıynsha qylmystyq quqyqbuzýshylyq (asa aýyr qylmys pen aýyr qylmystar) azaıdy. Adam ólimine alyp keletin jol-kólik oqıǵalary azaıdy. Bir jylda 93 mıllıon 357 myń teńgege ákimshilik aıyppul toltyrylypty.
