Bıyl Qazaqstan Respýblıkasynyń irgetasy - «Alashordanyń» qurylǵanyna 100 jyl toldy. Bul tarıhı datany oıdaǵydaı atap ótý - Alash arystary ańsaǵan azat Otanda ómir súrip jatqan bizder úshin abyroıly mindet. «Alash týy astynda, kún sóngenshe sónbeımiz!» dep áz jandaryn pıda etken ata-babalarymyzdyń amanatyn nasıhattaý - ár qazaqtyń bultarmas boryshy. Bul týraly Elbasy Nursultan Nazarbaev: «Alash arystary bizge memlekettilik ıdeıasyn tý etip kóterýdi tabystap ketti. 1991 jyly qurylǵan Qazaqstan Respýblıkasy atty memleket - sol arystardyń asyl armanynyń júzege asýy. Biz osy memleketti kózdiń qarashyǵyndaı saqtaýymyz kerek!», - dep edi.
Keńes úkimeti Alash arystarynyń atyn qansha óshirýge tyryssa da, ýaqyt kerýeni «Alashty» tý etken qasıetti esimderdi Qazaq júregine qaıtadan uıalatty. Tursyn Jurtbaı, Mambet Qoıgeldi, Sultan Han Aqqululy, Dıhan Qamzabek, Qaıyrbek Kemeńger bastaǵan , t.b. ǵalymdar men zertteýshiler Alashtanýǵa aıryqsha úles qosty. Sondaı-aq, Erlan Qarın, Berik Ábdiǵalıuly, Berik Ýálı, Bolat Múrsálim, Aıdos Sarym t.b. azamattar Alash ıdeıasyn nasıhattaýda búgingi býynnyń kóshin bastap júr.
Keshe ǵana QR Úkimet basshysynyń orynbasary Imanǵalı Tasmaǵambetov Úkimet úıinde jınalys ashyp, «Alashordanyń 100 jyldyǵyn» oıdaǵydaı ótkizý týraly tapsyrmalar berdi. Bul árıne quptarlyq jaıt. Degenmen, bul tarıhı data tek memlekettiń ǵana emes Alty Alashtyń toıy ekendigi kóziqaraqty jurtqa málim. Osyǵan oraı «Qamshy» aqparattyq agenttigi birneshe is-sharany qolǵa alyp otyr. Onyń eń birinshisi, Alash arystarynyń rýhyna arnap as berý. Qazaqta «óli razy bolmaı, tiri baıymaıdy» degen sóz bar. Endeshe, eń aldymen Alashshylardyń rýhyna baǵyshtap, mal soıyp, quran oqytyp, kıiz úıler tigip, jınalǵan jurtqa as berý - basty jumysymyz bolmaq. Qasıetti asty ótkizetin orynǵa Almatydaǵy Ahmet Baıtursynuly murajaıyn tańdadyq. 20 jyldan beri Baıtursynuly murasyn zerttep, murajaı tizginin ustap kele jatqan ustaz, ǵalym Raıhan Imahanbet bul usynysymyzdy qýana qabyldady. Alla buıyrtsa 5 naýryzda bılik ókilderi men qoǵam qaıratkerleri, óner juldyzdary qatysqan úlken as osy murajaıda ótpek. Asqa Alash Arystarynyń rýhyna quran oqýǵa QMDB bas múftıi Erjan qajy Malǵajyulyna arnaıy shaqyrý jiberdik. Al Almaty qalasy ákiminiń orynbasary Arman Qyryqbaev myrza bul asqa ákim Baýyrjan Baıbek nemese ózi mindetti túrde qatysatynyn aıtty.
Sonymen jınaqtaı aıtsaq, «Alashordanyń 100 jyldyǵyna» oraı «Qamshy» aqparattyq agenttiginiń bıylǵa atqaratyn is-sharalary mynadaı bolmaq:
1. Alash arystarynyń rýhyna arnalǵan as. 5 naýryzda Álıhan Bókeıhannyń týǵan kúnine oraı Almatydaǵy A.Baıtursynov Murajaı úıinde jylqy soıylyp, kıiz úıler tigilip as beriledi. Asqa bılik ókilderi men qoǵam qaıratkerleri bastaǵan 300-ge jýyq adam qatysady dep josparlanyp otyr.
2. 100 aǵash otyrǵyzý. Almaty qalasy ákimshiliginiń ruqsatymen belgilengen orynǵa 100 aǵash otyrǵyzylady. Bul sharaǵa kez kelgen adamnyń qatysýǵa múmkindigi bar.
3. 100 jetim balaǵa kıim-keshek syılaý. Ata-anasy joq, jetimder úıinde tárbıelenip jatqan jasóspirimderge bir jolǵy qamqorlyq. Bul sharaǵa kez kelgen adamnyń qatysýǵa múmkindigi bar.
4. 100 stýdentke stıpendıa. Joǵary oqý oryndarynda oqyp jatqan jetim balalarǵa, otbasynda qıynshylyǵy barlarǵa, úzdik oqıtyndarǵa bir jolǵy stıpendıa beriledi. Bul sharaǵa qoldaý kórsetý úshin kez kelgen adamnyń qatysýǵa múmkindigi bar.
5. 100 izbasar. «Qamshy.kz» oqyrmandarynyń saraptaýymen «Alashorda» murasyn zerttegen, nasıhattaǵan, izin jalǵaǵan, Qazaq eline aıryqsha eńbek etip jatqan 100 adam iriktelip alynady. Onyń ishinde 10 qaıratkerge «Alashordaǵa – 100 jyl» merekelik medali tabystalyp, syı-qurmet kórsetiledi.
«Qamshy» aqparattyq agenttigi qurylǵan 5 jyldan beri álem qazaqtaryna 3 álipbıde aqparat taratýmen shektelmeı, memlekettik, qoǵamdyq mańyzy bar sharalarǵa qal-qadirinshe atsalysyp keledi. «Qazaq handyǵyna – 550 jyl», «Qazaq daýysy» Halyqaralyq án baıqaýy, «Kósh jáne Kóshbasshy» merekelik konserti.... Munyń barlyǵy Qazaq eliniń baıandy táýelsizdigine tıtteı bolsa da úles qossaq degen shynaıy nıettiń týyndysy. "Elim" degen azamattardyń arqasynda myńdap adam qatysqan atalǵan is-sharalardy ótkizýge memleket tarapynan 1 tıyn qarajat almaǵanymyzdy aıta ketken jón. Óıtkeni el birligi men memleket tutastyǵy úshin isteletin kez kelgen jumysqa Qazaq eliniń ár azamaty úles qosýy tıis dep oılaımyz.
Bilál Qýanysh, «Qamshy» aqparattyq agenttiginiń jetekshisi
