BUU-da AQSH-tyń turaqty ókili Nıkkı Heılı Reseıge qarsy sanksıa Qyrymdy qaıtaryp bergenge deıin joıylmaıtynyn málimdedi. Heılı Ýkraınanyń shyǵysyndaǵy aýyr jaǵdaıǵa Reseıdi kinalady dep habarlaıdy bbc.com.
«Biz shynymen de Reseımen qarym-qatynasymyzdy jaqsartqymyz keledi. Alaıda Ýkraınadaǵy apatty jaǵdaı naqty jáne qatań túrde Reseıdiń is-áreketin jazalaýdy tilenip otyr» dedi Nıkkı Heılı óziniń BUU Qaýipsizdik Keńesinde sóılegen sózinde.
Heılı Vashıngtonnyń áli kúnge deıin Qyrymdy Ýkraınaǵa tıesili dep esepteıtinin aıtyp, Reseıdi basqynshylyq áreketin toqtatýǵa shaqyrdy.
Al Reseıdiń BUU-ǵy turaqty ókili Vıtalıı Chýrkın Qyrym turǵyndarynyń Reseı quramyna kirýge daýys bergenin alǵa tartty.
Sońǵy kezderi Donbasta qaıta qarýly qaqtyǵystar oryn alǵanyn eske salamyz. Eki tarap shıelenistiń týýyna bir-birin kinalaýda.
2016 jyldyń jeltoqsan aıynda Vashıngton hakerlik shabýyl týraly shýǵa qatysty Reseıge jańa sanksıa saldy. Qańtar aıynyń ortasynda Barak Obama Reseıge qatysty sanksıany taǵy bir jylǵa uzartqan.
Donald Tramp prezıdent qyzmetine kiriskeli beri, onyń Reseıge qarsy sanksıalardyń kúshin joıatyny týraly birneshe márte habar tarady. Tramp suhbattarynyń birinde Reseımen qarym-qatynasty jaqsartý úshin, ıadroly arsenaldy qysqartý týraly shart qoıǵanyn aıtqan. Alaıda kóp uzamaı ol jaqyn ýaqytta sanksıanyń kúshin joımaıtynyn habarlady.
