Sońǵy kúnderi qyzý talqyǵa túsken Dımash Qudaıbergenov pen Reseılik ánshi Vıtastyń arasyndaǵy daý-damaıǵa qatysty Vıtas málimdeme jasady. Facebook áleýmettik jelisindegi jeke paraqshasynda Reseılik ánshi halyqty sabyrǵa shaqyryp, ózine baǵyttalǵan turpaıy da synı sózderin doǵarýyn ótingen.

«Qurmetti dostar!

Resmı málimdeme jasaǵym keledi: sońǵy tórt kúnniń ishinde meniń jeke basyma baǵyttalǵan jaǵymsyz pikirler áleýmettik jelilerde qaptap ketti. Sizderge aıtaıyn degenim – men kez kelgen shyǵarmashylyqpen aınalysatyn adamnyń eńbegin baǵalap, ondaı jandarǵa syılastyqpen qaraımyn. Ózimdi bir kúnderi ózge adamnyń shyǵarmashylyq ómirine aralasyp, sotqa júginemin dep oılaǵan emespin. Eshqashan da bulaı istemeımin.

Sońǵy kezderi árbir ártistiń aınalasynda bolyp jatqan sot prosesteri – óz elin tanytýshy prodúserler men kompanıalardyń arasyndaǵy keleńsizdikter. Tanymal ánshilerdiń arasynda túrli daý-damaılar men sot prosesteri únemi bolyp otyrady., alaıda mundaı jaǵdaıda kez kelgen adamnyń jeke basyn qorlaıtyn jaǵymsyz pikirler men ózara keleńsizdikter týǵyzýǵa bolmaıdy. Odan da barlyqtaryńyz sabyr saqtap, maǵan «laık» basyńyzdar.

Qurmetpen, Vıtas!», - deıdi ánshi.

Esterińizge sala ketsek, otandyq ánshi Dımash Qudaıbergenov Qytaıda ótip jatqan «Men ánshimin» baıqaýyna qatysyp, eki kezeńde de qarsylastarynyń arasynan oza shaýyp, birinshi orynǵa taban tiregen bolatyn. Baıqaýdyń ekinshi kezeńinde ánshi Vıtastyń «Opera-2» ánin 4 oktava 2 tonǵa joǵary oryndap, halyqty tańdaı qaqtyrǵan. Qytaı eliniń mıllıardtaǵan halqy jas ánshi Dımashtyń tabynýshylaryna aınalyp, Qazaqstandyq ánshi biraz tanymaldylyqqa ıe bolǵan. Osy oraıda Reseılik ánshi Vıtastyń prodúseri Dımash Qudaıbergenovtyń «Opera-2» ánin ruqsatsyz oryndady degen aıyppen sotqa aryz-shaǵym túsirgen bolatyn. Sonymen qatar Qazaqstandyq qoldaýshylary Dımashty «Qazaqtyń Vıtasy» degen atpen de atap ketken. Alaıda, bul is bastalǵaly beri, ánshi Vıtasqa baǵyttalǵan túrli jaǵymsyz pikirler kóbeıip, áleýmettik jelilerde «Vıtastyń shynaıy daýysy osyndaı» degen vıdeolar qaıtadan nazarǵa ilige bastady.

Qamshyger: Nazerke Labıhan