Búgin Aqordada ótken QR Úkimetiniń keńeıtilgen otyrysynda Elbasy Nursultan Nazarbaev elimizdiń Qarjy mınıstri Baqyt Sultanovtyń qyzmetine kóńili tolmaıtyndyǵyn ashyq aıtty, dep habarlaıdy Qazaqparat.

Elbasy óz sózinde búginde Qazaqstannyń damý bankin basqaryp otyrǵan Bolat Jámishev elimizdiń Qarjy mınıstri laýazymyn laıyqty atqara alýy múmkin ekendigin atap ótti.

«Egerde bizde durys Qarjy mınıstri, qazynashy bolsa, onda ol árbir tıyndy qadaǵalap otyrar edi. Al sen bere beresiń. Memleket qazynasy saǵan senip tapsyryldy. Sen meniń qazynany qadaǵalaıtyn jeke ókilimsiń», - dedi Elbasy Qarjy mınıstri B.Sultanovqa qarata.

Sonymen qatar N.Nazarbaev Qarjy mınıstri memleket qarjysyn tyńǵylyqty qadaǵalaýy kerektigin basa aıtty. 

«Eń durysy Jámishevti qoıý kerek shyǵar. Eshkimmen sóılespeıtin bolady. Múmkin bireýlerge unamaıtyn shyǵar, maǵan da keıde unamaı qalady. Biraq, ol jetek sıaqty tik, bul anyq. Memlekettiń múddesin de qorǵaıdy», - dedi QR Prezıdenti.     

Bıylǵy Joldaý aıasynda qoıylǵan mindetter jaıynda aıta otyryp, Nursultan Nazarbaev mınıstrler kabınetine birneshe tapsyrma berdi. Sonyń ishinde Prezıdent barlyǵyna búdjetti únemdeýge shaqyrdy.  

"Almatyda Ýnıversıada ótip jatyr. "Bul eń arzan Ýnıversıada boldy", – deıdi Halyqaralyq ýnıversıada jetekshisi. Óıtkeni biz únemdeýdiń barlyq múmkindikterin ıgerdik", - dedi Prezıdent kólemdi sharalardy qarjy únemdeı otyryp ótkizýge bolatynyna mysal keltirip. 

«Biz barlyǵymyz memlekettik qyzmetkermiz, halyqqa, elge qyzmet etýimiz kerek. Onda qyzmet eteıik - memlekettiń ár tıynyn únemdep jumsaıyq. Munymen nege men ǵana aınalysýym kerek? Búdjet sizderge berildi me, qalaı únemdeý kerektigin sizder oılanýlaryńyz kerek», –dedi Elbasy.

 "Men saǵan memlekettik qarjyny durys paıdalaný týraly bir ret aıtqanmyn. Endi ekinshi ret eskertý aıtyp otyrmyn. Úshinshi ret eskertý aıtylsa, jaǵdaıyń múshkil bolýy múmkin", – dedi Nursultan Nazarbaev.