Memlekettik qyzmettegi bos oryndar qysqartylyp, jalaqysyn jaqsy jumys isteıtin memlekettik qyzmetshilerge bólip beredi. Búgin úkimettiń keńeıtilgen otyrysynda Prezıdent Nursultan Nazarbaev osyndaı tapsyrma berdi, dep habarlaıdy Baq.kz
«Men ózim qyzmettiń barlyq satysynan óttim. Bólimde 15 adam otyrsa, bar jumysty 3-aq adam isteıdi. Qalǵany qalam ǵana ustaýdy biledi. Bilemiz ǵoı bárimiz. Osynsha adamdy ustap qajeti qansha? Olardy jumystan shyǵaryp, jalaqysyn jaqsy jumys isteıtin qyzmetshilerge bólip berý kerek. Sonda bilikti adamdardy tańdap alýǵa múmkindik bolady», - dedi Elbasy.
Memlekettik qyzmet isteri jáne sybaılas jemqorlyqqa qarsy kúres agenttiginiń tóraǵasy Qaırat Qojamjarovtyń aıtýynsha, mınıstrler men ákimderdiń qazir osyndaı múmkindigi bar.
«B» korpýsynda attestasıa júrip jatyr. Jańaǵy aıtylǵan máseleni árbir mınıstr, ákim júzege asyra alady. Iaǵnı, jumys istemeıtin qyzmetkerlerdi bosatyp, onyń jalaqysyn qaldyryp, sol arqyly jumys isteıtin azamattardyń jalaqysyn arttyrýǵa bolady», - dedi Memlekettik qyzmet isteri jáne sybaılas jemqorlyqqa qarsy kúres agenttiginiń tóraǵasy Qaırat Qojamjarov.
Onyń aıtýynsha, memlekettik qyzmettegi 100 myńdaı orynnyń búginde 17-18 paıyzdaıy bos tur.
«Men mindetti túrde bos 18 myń orynnyń barlyǵyn qysqartyp tasta dep otyrǵan joqpyn. Onyń ishinde taba almaı júrgen kerekti adamdardyń orny bar shyǵar. Sonda da qysqartýǵa bolatyndardy qysqartyp, jalaqysyn qaldyrý kerek. Ákimder men mınıstrlerge jaqsy jumys isteıtin qyzmetkerlerdiń arasynda bólip berýge ruqsat berip, jalaqyny kóterý kerek», - dedi N.Nazarbaev.
Prezıdent bolashaqta memlekettik qyzmetshilerdiń jalaqysyn bıznestegi deńgeıge jetkizý kózdelip otyrǵanyn aıtty.
«Bul jemqorlyqpen kúres. 5 ınstıtýttyq reforma aıasynda memlekettik qyzmetshilerdiń tabysy boıynsha áli jetken joqpyz. Jaǵdaı túzelgennen keıin ony jasaımyz, kóteremiz. Maqsatymyz - memlekettik qyzmetshilerdiń jalaqysyn bıznestegi deńgeıge jetkizý. Sonda qoıady. Biraq qazaq qoımaıdy-aý. Qansha berseń de, az bolady», - dedi Memleket basshysy.
Aıta keteıik, Qazaqstan Prezıdenti Nursultan Nazarbaevtyń qatysýymen Úkimettiń keńeıtilgen otyrysy ótti. Jıynda aldymen eldiń 2016 jylǵy áleýmettik-ekonomıkalyq damýynyń qorytyndylary talqylandy. Keıin Memleket basshysy túıitkildi máselelerdi kóterip, aldaǵy jumysty aıqyndap, úkimet múshelerine tapsyrmalar berdi.
Pikir qaldyrý