Astanada 2017 jylǵy 3 aqpandaǵy QR Úkimetiniń keńeıtilgen otyrysynda berilgen Memleket basshysynyń tapsyrmalaryn oryndaý máseleleri boıynsha QR Úkimetiniń otyrysy ótip jatyr.
Eske salsaq, aldynda QR Prezıdenti Nursultan Nazarbaevtyń qatysýymen Qazaqstan Úkimetiniń keńeıtilgen otyrysy ótti, onyń barysynda QR Prezıdentiniń Joldaýyn oryndaý boıynsha mınıstrler kabınetiniń aldyna birqatar naqty mindetter qoıylǵan bolatyn.
Premer-Mınıstr Baqytjan Saǵyntaev QR-daǵy bıznes ahýaldy jaqsartý boıynsha biraz jumys jasalǵanyn, alaıda bızneske retteý júktemesi artýyn jalǵastyrǵanyn atap ótti.
«Bir jaǵynan biz bıznes júrgizýdi jaqsartý úshin zańdarǵa ózgerister engizemiz, prosedýralardy jeńildetemiz. Sońǵy bes jylda ruqsat qujattarynyń sanyn 3,2 esege qysqarttyq. Al, ekinshi jaǵynan osy kezeńde bıznestiń múddesine qatysty qabyldanǵan normatıvtik-quqyqtyq aktiler sany kerisinshe 1,7 esege artty. Olardyń 85% - ákimdikter men máslıhattar aktileri», - dep atap ótti B. Saǵyntaev.
Osyǵan baılanysty Premer-Mınıstr B. Saǵyntaev ulttyq ekonomıka jáne ádilet mınıstrlikterine osy máseleni sheshýdi tapsyrdy. Budan ózge, Ulttyq ekonomıka mınıstrligine múddeli organdarmen jáne «Atameken» UKP-men birge bir aıda barlyq baqylaý-qadaǵalaý fýnksıalaryn aýqymdy tekserýdi aıaqtaý tapsyryldy.
«Birinshi kezekte bızneske kóterińki talaptar men ákimshilik kedergilerdi qysqartý qajet. Zańnamalyq aktilerge barlyq qajetti ózgeristerdi aǵymdaǵy jyly qabyldaý kerek», - dep basa aıtty B. Saǵyntaev.
Premer-Mınıstr B. Saǵyntaev Memleket basshysy tarapynan salyq organdaryna kóp sógis aıtylǵanyn atap ótti. Ásirese, negizsiz tekserister men salyq zańnamasyn is-tájirıbede qoldaný qıyndyqtaryna qatysty.
Osyǵan baılanysty B. Saǵyntaev QR Qarjy mınıstrligi Memlekettik kirister komıtetiniń bıznesti tekserýdi ońtaılandyrý turǵysyndaǵy jumysyn qaıta qurýdy tapsyrdy. Budan bólek, Premer-Mınıstr bir aıda Bas prokýratýramen birge negizsiz júrgizilgen isterdi retteýdi tapsyrdy.
«Osyndaı isterdi júrgizgender jazasyn alýy tıis», - dep atap ótti B. Saǵyntaev.
Sondaı-aq, Premer-Mınıstr B. Saǵyntaev Ulttyq ekonomıka mınıstrligine múddeli organdarmen birge jańa Salyq kodeksin ázirleý kezinde ákimshilendirýdi túbegeıli jeńildetýdi jáne ony barynsha qarapaıym qylýdy tapsyrdy.
«Onyń aldynda biriktirilgen Salyq jáne kedendik kodeks ázirleý josparlanǵan bolatyn. Alaıda, Prezıdenttiń tapsyrmasyna sáıkes ulttyq ekonomıka jáne qarjy mınıstrlikterine jeke salyq jáne kedendik kodeksterdi ázirleý qajet», - dep qorytyndylady B. Saǵyntaev.
