1 naýryzdan bastap Naýryz merekesine deıin Tájikstandaǵy joǵarǵy oqý ornynyń stýdentteri sabaqqa ulttyq kıimmen kelýi kerek. Tájikstannyń bilim jáne ǵylym mınıstrliginiń jazbasha nusqaýy boıynsha, ulttyq kıimdi joǵary oqý oryndary men mekteptegi ustazdar qaýymy da kıýi tıis. Bul týraly www.centralasian.org jazdy.
Mınıstrliktiń baspasóz hatshysy Ehsonı Hýshvakttyń aıtýynsha, naýryz aıynda tájik qyzdary atlas pen adrastan tigilgen ulttyq kıim men keste basylǵan chakan kıedi. Naýryz merekesi kezinde de olar merekelik kıimmen júredi.
Resmı nusqaýda "tájik halqynyń ejelgi dástúrin qaıta jandandyrý" maqsatynda osyndaı sheshim qabyldanǵany aıtylǵan. Naýryz merekesi Tájikstanda 21-24 naýryz aralyǵynda atap ótiledi.
Dýshanbedegi joǵarǵy oqý oryndaǵylar osyndaı nusqaý alǵandaryn rastady. Buǵan deıin Naýryz merekesi kezinde qyzdarǵa ulttyq kıim kıip kelý týraly keńes beriletin, biraq ol kezde resmı nusqaý berilmeıtin.
Al, Qyrǵyzstanda ulttyq naqyshtaǵy biryńǵaı mektep formasy 2014 jyly qańtar aıynda engiziletini habarlanǵan bolatyn. 3 jyl buryn Qyrǵyzstan Respýblıkasy Bilim jáne ǵylym mınıstrligi osyndaı sheshim shyǵarǵan.
Sodan beri qyrǵyz mektepterindegi oqýshylar aıyrqalpaqtaryn tastamaı júr dese de bolady.
Qazaqstanda mektep formasy jyl saıyn bilim kúni qarsańynda daýǵa aınalady. Kóptegen mektep dırektorlary oqýshylardy óziniń áldebir tanysynyń fırmasy tikken mektep formasyn alýǵa májbúrlep jatady.
Al, mınıstrlik tarapynan ázirge jalpyulttyq birińǵaı mektep formasy týraly áńgime shyqpaǵan. Alaıda, Tájikstannyń «tájik halqynyń ejelgi dástúrin qaıta jandandyrý» ıdeıasyn Qazaqstanda da qoldanýǵa bolady. Kóbine kenje qalyp qalatyn, shet qaǵylatyn «Qazaqtyń mádenıetin» nege memleket tarapynan qaıta jandandyrmaımyz? Ondaı bolǵan jaǵdaıda balalar da, ata-analar da úlken bas aýrýdan aıyǵar edi. Sonymen qatar Qazaqstandaǵy eki mıllıondaı oqýshy men muǵalimderge ulttyq naqyshy bar birińǵaı úlgidegi kıim tigýden arnaıy kásiporyn ashyp, biraz adamdy jumyspen qamtı da alar edik. Onsyz da balalarymyz kıetin kostúm men kóılekti Qytaı men Túrkıadan tasımyz. Eń bastysy, qazaqy ıis, qazaqy bolmys kerneıtin edi oqý oshaqtaryn.
Aqan Bektas
