EO Reseıge tasymaldaýǵa tyıym salynǵan azyq-túlikti tegin taratady. Bul týraly EO-nyń resmı saıtyna silteme jasap Tengrinews.kz  jazdy. Mundaı shara reseılik sanksıadan aýylsharýashylyǵy taýary naryǵyn qorǵaý úshin qoldanylyp otyrǵan kórinedi.  

"Reseı bizdiń aýylsharýashylyǵy ónimderin tasymaldaýǵa tyıym salǵannan keıin naryqta oryn alǵan jaǵdaıdy eskere otyryp, men eýropalyq naryqta jemis-jıdek pen kókónister usynysyn qysqartýǵa múmkindik beretin tótenshe sharalardy qoldanýdy usynamyn" dep málimdegen 18 tamyzda EO-nyń aýylsharýashylyǵy boıynsha komısary Dachıan Cholosh. Daǵdarysqa qarsy sharalardy júzege asyrý úshin shamamen 125 mıllıon evro bóliný kózdelgen.

Eýropalyq odaq, negizinen, jyldam búlinetin, artyǵymen usynylyp jatqan jemis-jıdek pen kókónisterdi satyp almaqshy. Reseı shekteýinen zardap shekken azyq-túlikti tasymaldaýshylardyń irilerine de, sol sekildi usaq fermerlerge de qoldaý kórsetiledi dep habarlanady. Bul sharaǵa ilinetin taýarlarǵa qyzanaq, túrli-tústi qyryqqabat, sańyraýqulaq, júzim, qıar jáne basqa da merzimdi baý-baqsha daqyldary enedi. Keıinnen úkimet munyń barlyǵyn EO boıynsha tegin taratatyn bolady.

Eske sala ketelik, tamyzdyń basynda Reseı ózine qarsy sanksıa qoldanǵan Batys elderine sıyr etin, shoshqa etin, qus etin, balyq, kókónister, jemis-jıdek, sút ónimderin tasymaldaýǵa tyıym salǵan bolatyn.

Qamshy-aqparat