Din isteri jáne azamattyq qoǵam mınıstrligi QMBD-men yntymaqtastyq ornatty

2017 jylǵy 15 aqpanda Mınıstrlikter úıi ǵımaratynda  Qazaqstan Respýblıkasy Din isteri jáne azamattyq qoǵam mınıstrligi men Qazaqstan musylmandary dinı basqarmasy arasynda Yntymaqtastyq týraly kelisimge qol qoıyldy.

İs-sharanyń basynda sóz alǵan Mınıstrlik basshysy Nurlan Ermekbaev Qazaqstan musylmandary dinı basqarmasy el musylmandarynyń basyn qosyp otyrǵan jáne qoǵam aýyzbirshiligi men turaqtylyǵyn nyǵaıtý isinde úlken jumystardy iske asyryp otyrǵan dinı birlestik ekenin aıta kele «...biz din salasyndaǵy memlekettik saıasattyń tıimdiligin arttyrýǵa baǵyttalǵan is-sharalarda Dinı basqarmamen jan-jaqty ózara is-qımyl jasaıtyn bolamyz. Kelisimge qol qoıýymyzdyń basty sebebi de osy» dep atap ótti.

Mınıstr Memleket basshysynyń halyqqa arnaǵan bıylǵy Joldaýynda aıtylǵan qoǵam qaýipsizdigin qamtamasyz etý jelisinde dinı ekstremızmdi nasıhattaýdyń aldyn alýda jáne óskeleń urpaqty rýhanı-adamgershilik rýhynda tárbıeleý isinde dinı birlestiktermen birlesip jumystar júrgizý týraly tapsyrmasyn oryndaý barysynda Mýftıatpen kóptegen is-sharalardy birlesip atqarýdy kózdep otyrǵanyn jetkizdi.

QMDB Tóraǵasy, Bas mýftı Erjan qajy Maıamerov «Yntymaqtastyq týraly kelisim Mýftıat jáne memleket arasynda yntamaqtastyqty nyǵaıtýǵa jol ashady.

Bul eki tarapqa turǵyndar arasynda dástúrli rýhanı qundylyqtardy nasıhattaýǵa jáne dinı ekstremızm men terorızmniń aldyn alýǵa baǵyttalǵan aqparattyq-túsindirý jumystaryn qarqyndy júrgizýge múmkindik beredi.

Saıyp kelgende, din salasyndaǵy ýákiletti organmen birlesip iske asyrylatyn jumystar jastarymyzdyń boıynda zaıyrly memlekettiń qaǵıdattaryna sáıkes keletin rýhanı qundylyqtardy qalyptastyrýǵa negiz bolady» dep atap kórsetti.

İs-shara taraptardyń Kelisimge qol qoıýymen aıaqtaldy.