Nurbosyn Asanberdıev esimdi azamat Facebook paraqshasyna óziniń jáne «7 kontınent» bıznes ortalyǵyndaǵy keńseni satyp alǵandardyń máselesimen bólisti.
32 jastaǵy Nurbosyn Asanberdıev 2015 jyldan bastap kásipkerlikpen aınalysa bastaǵan. Ol fıtnes-klýb ashý úshin «7 kontınent» bıznes ortalyǵynan ǵımarat satyp alady. 4 aı jóndeý jumystaryn júrgizip, fıtnes-klýbqa qajetti quraldardy satyp alǵanyn jazady.
Qazirgi tańda fıtnes-klýbta 20 adam jumys isteıdi jáne 1000-nan asa adam turaqty kelip, jattyǵyp turady eken.
«7 kontınent» bıznes ortalyǵynyń qurylysy 2006 jyly bastalǵan. 2008 jyly qurylys nysanynyń menshik ıesi «Shyryn Ltd» kompanıasy boldy. Sol jyly, ıaǵnı 2008 jyly Nurbank «Shyryn Ltd» kompanıasyna qaryzǵa aqsha bergen. Al 2011 jyly bolashaqta bolatyn kepildemeni qoıý týraly kelisim shartqa qol qoıǵan. Nurbosyn Asanberdıev atalmysh kelisim sharttyń tek 3 jyldan keıin ǵana jasalǵanyna tań qalatynyn aıtady. Belgili bolǵandaı jyljymaıtyn múlikke (ǵımarat paıdalanýǵa berilgennen keıin) kepildemege qatysty kelisim shart múlde jasalmaǵan bolyp shyqty. 2013 jyly «7kontınent» bıznes ortalyǵy "Shyryn Ltd" kompanıasyna qoldanýǵa berildi. Atalmysh kompanıa ǵımarattaryn sata bastady.
Bastapqy kezde jyljymaıtyn múlikke kepildeme qoımaǵany jáne banktiń mundaı iri qaryz alǵan kompanıany qalaı baqylamaǵany túsiniksiz. Endi qazir sot bolyp «Shyryn Ltd» kompanıasyna tıesili «7 kontınent» ǵımaratyna arest qoıyldy.
2015 jyldyń 15 qarashasynda sot «Shyryn Ltd» kompanıasyna tıesili barlyq jyljymaıtyn múlikti alý týraly sheshim qabyldaǵan. Onyń ishinde Nurbosyn Asanberdıevtiń de satyp alǵan ǵımaraty bar. Onyń mundaı máseleleri bar ekenin kásipker bilmegenin jáne 2016 jyldyń naýryz aıynda múligine arest qoıylǵanyn jazdy.
Nurbosyn Asanberdıev, bank kompanıaǵa kepildemesiz qaryz berip, odan keıin ǵımarat salynyp, paıdalanýǵa berilip jáne ondaǵy turǵyn úıler men komersıalyq jyljymaıtyn múlikterdi satyp, odan keıin Bank kompanıany sotqa berip, zańdy ıelerdiń páterlerin jáne komersıalyq jyljymaıtyn múlikterin tartyp alýǵa sot sheshim shyǵaratynyna nalıtynyn jetkizdi.
«Jyljymaıtyn múlikti satyp,olardan aqsha alyp, odan keıin qaıta sol múlikterin tartyp alady. Bul qalaı boldy?» deıdi Nurbosyn Asanberdıev.
Kásipker ǵalamtor, teledıdar, gazet pen radıodan orta jáne kishi kásipkerlikti damytý úshin túrli baǵdarlamalar qabyldanyp, qyrýar qarjy bólinip jatqanyn jıi estip, oqıtynyn, alaıda shynaıy ómirde keleńsiz máselelermen betpe-bet keletinin aıtady.
«Aıtyńdarshy men sonda basqa Qazaqstanda turyp jatyrmyn ba?» deıdi Nurbosyn Asanberdıev.
Ol buǵan deıin basyndaǵy máseleni aıtyp vıdeo jazyp, jarıalaǵan.
