Keı adamdar senimen emes, seniń ústindegi shúberekpen, shúberekten shyǵyp turatyn fransýz átiriniń ıisimen, qaltańdaǵy shytyrlaq qaǵaz aqshamen, astyndaǵy kóligińmen qarym-qatynas jasaǵysy keledi.
Tizimdegi dúnıe bolmasa, sóılesýge de qulyqsyzdyq tanytady. Teginde ondaı pendeler keshegi kedeı bolǵanyn umytqan, keshirińiz, umyta almaǵan, óz ishinen kedeı bolmysyn joıa almaǵan adamdar.
Jan dúnıesi de, tán dúnıesi de baı kisilerge seniń kıim-keshegiń de, mingen kóligiń de, taqqan saǵatyń men jaqqan maıyń da qajet emes. Ondaı dúnıe ózinde barshylyq bolǵandyqtan, ol jan izdeıdi, jaqsy áńgime, taza qarym-qatynas kútedi.
Al, seniń bolmysyńdy syrtyńdaǵy bózińnen tanıtyndarda shyn máninde asyp-tasyp jatqan baılyq ta, rýhanı kemeldik te, saıtan da joq. Jáne eń bastysy olar jan rahaty aqshada emes ekenin baıaǵyda umytqan nemese ondaı túsinik olarda eshqashan bolmaǵan.
Taǵy bir qyzyq adamdar bolady-eı! Seniń jaǵdaıyń jaqsy kezde, kóre almaǵannan jarylardaı bop júrse de, seniń qasyńnan shyqpaıdy. Basyńnan baq taıǵan kúni kóleńkesi de kórinbeı qalady. Kóleńkesi bar bolsyn, ózimen ketse, yrza bolasyń ǵoı. Bir ıttiń balalary bolady, olar: "Biz seni túk te jaqsy kórmeıtinbiz, biz seni sol kezde jaqsylap turyp paıdalanǵanbyz ǵoı, netken aqyldy bolǵanbyz, shirkin-oý! - deıdi. Al, sen she, sen baıǵus sony da baıqamaı elpildep júgire beretinsiń. Áı, áı, áı sol kezde naǵyz aqymaq boldyń ǵoı!" - dep seni muqatqysy kelip, óziniń sonshalyq sorly ekenin kórsetip qoıady.
Sen tipti ondaılardyń sonshalyq sorly ekenine tańqalyp, ishteı aıap, burylyp júre beresiń. Júregiń syzdaıdy biraq. Ol da ótedi. Esesine keremet sabaq, tabylmaıtyn mektep!
Álgilerdiń teginde jany da, táni de eshqashan baıymaıdy. Bul Táńirdiń ornatqan zańdylyǵy. Tipti ýhıt-sýhıt qylyp júrip baıyp aldy delik, alaıda olar joǵaryda aıtylǵan qaıyrshy bolmysyn joıa almaı ómirden ótedi.
Al, bir kúnderi bolǵan, ertesińde joǵalǵan, arǵy kúni qaıtyp oralǵan tán baılyǵynyń ıeleri eki toptyń arasyndaǵy álgi taza adamdar sol myzǵymaǵan qalpynda qala beredi. Sebebi, olar dúnıe parqyn jaqsy biledi, jany da laılanbaıdy. Táńirge de jaǵymdy, jaqsy ómirge de beıim.
Eń sońynda kim jeńbek? Iá, tazalyq jeńbek qoı, árıne! Adaldyq jeńbek, adamǵa degen mahabbatty dúnıemen ólshemegen parasattylyq jeńbek!
Siz qandaı adam bolýdy tańdasańyz, sondaı adam bolasyz. Bári de óz qolyńyzda.
"Facebook" áleýmettik jelidegi paraqshasynan.
Pikir qaldyrý