Búgin Astanada Qazaqstan Respýblıkasy men Reseı Federasıasynyń 2017 jylǵa arnalǵan mádenıet salasynda birlesken áreketter josparyna qol qoıý saltanatty rásimi ótti. Ekijaqty mádenı yntymaqtastyqty odan ári nyǵaıtý men damytýǵa baǵyttalǵan strategıalyq qujatqa QR Mádenıet jáne sport mınıstri Arystanbek Muhamedıuly men RF Mádenıet mınıstri Vladımır Medınskıı qol qoıdy.
Saltanatty qol qoıý rásimi barysynda vedomstvo basshysy aıtyp ketkendeı, birlesken áreketter jospary Qazaqstan Respýblıkasy Mádenıet jáne sport mınıstrligi men Reseı Federasıasy Mádenıet mınıstrligi arasyndaǵy 2017-2019 jyldarǵa arnalǵan yntymaqtastyq baǵdarlamasyn júzege asyrý maqsatynda bekitilip otyr.
«Qazaqstan men Reseıdi ózara túsinistik pen syılastyqqa negizdelgen tyǵyz dostyq pen tatý kórshilik qarym-qatynastar baılanystyrady. Búgin qol qoıylyp jatqan qujat memleketterimizdiń arasynda uzaq jyldar boıy qalyptasyp kele jatqan yntymaqtastyǵymyzdy jalǵastyratyndyǵyna senimdimin», – dedi A. Muhamedıuly.
«Bizdiń kelisim dereksiz emes, naqty. Biz kıno óndirisi salasyndaǵy yntymaqtastyq jóninde ýaǵdalastyq. Sondaı-aq, EKSPO aıasynda Astanaǵa Marıın teatry, Mıhaılov teatry keledi, Chehov atyndaǵy MKT gastrólderi týraly kelissózder júrgizilip, Astanada Ermıtajdyń úlken kórmesin ótkizý týraly kelissózder aıaqtalýda» – dep atap ótti Vladımır Medınskıı.
Aıtyp ótýimiz kerek, «28 panfılovshy» fılmi – ótken jylǵy reseılik jáne qazaqstandyq prokattyń kóshbasshysy. RF Mádenıet mınıstrligi men QR Mádenıet jáne sport mınıstrliginiń qoldaýymen túsirilgen kınotýyndy prokattyń qalyptasqan barlyq merzimderine saı bolyp, bir aı boıy kórsetildi. Halyqaralyq kınonaryqqa shyǵý josparlanyp otyr. QR Mádenıet jáne sport mınıstri Arystanbek Muhamedıuly men RF Mádenıet mınıstri Vladımır Medınskıı fılmdi jasaýǵa qosqan úlesteri úshin «2016 jyldyń jyl adamy» boldy.
Qabyldanǵan Áreketter josparyna sáıkes, memleketter 2019 jyldy Qazaqstan-Reseı mádenıet almasý jyly dep jarıalaý múmkindigin qarastyrýǵa kelisti. Bul qadam mádenı-gýmanıtarlyq baılanystarǵa jańa serpin bere otyryp, qazaqstan-reseı iri kólemdi jobalarynyń úılesimdiligin qamtamasyz etetin bolady. Taraptar joǵary belgilengen bastamalardy júzege asyrýǵa Qazaqstan Respýblıkasy jáne Reseı Federasıasynyń aımaqtaryn da tartýdyń qajettigi týraly biraýyzdan pikir bildirdi.
Odan basqa, josparǵa qatysýshylar Astana qalasynda EKSPO-2017 Halyqaralyq mamandandyrylǵan kórmeniń jumysy barysynda mádenı sharalardy ótkizýge barynsha qoldaý kórsetýge kelisti. Reseı tarapy Qazaqstan Respýblıkasynyń M. Lermontov atyndaǵy Memlekettik akademıalyq orys drama teatrynyń gastrólderin Reseı Federasıasynyń aıqmatarynda, sonyń ishinde Tomsk, Novosıbırsk, Kemerovo jáne Barnaýl qalalarynda 2017 jyldyń kúzinde ótkizýge yqpal jasaıtyn bolady.
Sonymen qatar Josparda mádenı muralardy saqtaý men mádenıet jáne tarıhı eskertkishterdi týrısik aınalymǵa engizý salasynda tájirıbe almasý, ortaq tarıhı meıramdardy merekeleýge arnalǵan mádenı is-sharalardy ótkizýge qoldaý kórsetý boıynsha jumysty jalǵastyrý kózdelgen. Qujatta Qazaqstan Respýblıkasy men Reseı Federasıasynyń kınematografıa, týrızm salalaryndaǵy yntymaqtastyq máselelerine kóńil bólingen.
Sondaı-aq qol qoıý rásimi barysynda Arystanbek Muhamedıuly Reseı Federasıasynyń mádenıet mınıstri V.R. Medınskııge Qazaq ulttyq ýnıversıtetiniń qurmetti profesory ataǵy dıplomyn tabystady.
Esterińizge salsaq, 17 jáne 19 aqpan aralyǵynda Reseı akterleriniń qatysýymen Astanada Reseı kınosy kúnderi ótti. Olardyń qatarynda rejıser Nıkolaı Homerıkıdiń «Ledokol» kórkem fılmi, rejıserler Maksım Volkov pen Andreı Galattyń «Volkı ı ovsy: bezýmnoe prevrashenıe» anımasıalyq fılmi, rejıser Nıkolaı Lebedevtyń «Ekıpaj» kórkem fılmi, rejıser Oksana Karastyń «Horoshıı malchık» kórkem fılmi. Kórkem, anımasıalyq fılmderiniń qaıyrymdylyq kórsetilimine balalar úıi men az qamtylǵan otbasy balalary shaqyryldy.
Reseı kınosy kúnderi Qazaqstan Respýblıkasy men Reseı Federasıasynyń arasyndaǵy Mádenı yntymaqtastyq týraly kelisim, sonymen qatar 2016 jylǵy 5 qyrkúıekte Máskeýde qol qoıylǵan 2017-2019 jj. arnalǵan QR Mádenıet jáne sport mınıstrligi jáne RF Mádenıet mınıstrligi arasyndaǵy Mádenıet salasyndaǵy yntymaqtastyq baǵdarlamasy aıasynda ótkizildi. Barlyq is-sharalar reseılik tarap esebinen ótkizilgen bolatyn.
