Ótken shaqqa qaraılaı berýdi emes, baıandy bolashaqqa umtylǵan eldiń umytylmas ustanymyn alýymyz kerek. Bul týraly Elbasy Qazaqstan Respýblıkasy Ulttyq ǵylym akademıasynyń jalpy jınalysynyń saltanatty sesıasynda málimdedi. Aqparatty tengrinews.kz jańalyqtary habarlaıdy.
 

"Qurmetti akademık myrzalar, Muhtar Áýezovtiń "Halyq pen halyqty, adam men adamdy teńestiretin - bilim" degen sózi bar. Biz máńgilik el bolýǵa umtylǵan, órleýdi, kórkeıýdi maqsat etken halyqpyz. Biz ótken shaqqa qaraılaı berýdi emes, baıandy bolashaqqa umtylǵan eldiń umytylmas ustanymyn alýymyz kerek. Keıde anaý tarıhqa, "Tomırıs qazaq eken", "Shyńǵysqan qazaq eken" degende meniń ishim aýyrady. Bizdiń basqa aıtatyn sózimiz joq pa? Basymyzdy artqa buryp, alǵa qaraı qalaı júremiz? Alǵa qaraıtyn kez keldi. Tonı Blerdyń óziniń parlamentinde aıtqan sózi bar edi "Ulybrıtanıanyń uly tarıhy bar. Biraq biz mýzeılerde ómir súrmeımiz ǵoı, adamdardy kompúter aldyna otyrǵyzýymyz kerek" degen. Sol sıaqty myna biz de oılanýymyz kerek. Sizderden, zıaly qaýym, bilimdi, dýaly aýyzdy adamdardan shyǵatyn sózder bolýy kerek. Bolashaqty oılaýymyz kerek. Sondyqtan "jańa jaǵdaıda Qazaqstannyń bolashaq urpaǵy qandaı bolýy kerek degen suraq bolýy kerek" degen saýaldyń týyndaıtyny zańdylyq. Biz uly dala tósinde uly memleket qurǵan aǵa býynbyz osy otyrǵan. Men de sizderdiń qatarlaryńyzǵa kirdim, qudaı buıyrtsa. Bizge osy kıeli jetistikterimizdi erteń baıandy etetin, otanymyzdyń asqaq bolmysyn eseleı túsetin zerek te, zıaly urpaq kerek", - dedi Nazarbaev.

Nursultan Nazarbaev Ulttyq ǵylym akademıasynyń jalpy jınalysynyń sesıasynda Qazaqstanǵa qandaı urpaq kerek ekenin aıtty. 

"Zıatker urpaq kerek. Ol qandaı urpaq? Ol rýhanı baı, Táýelsizdikti pir tutatyn, tarıhyn, dini men mádenıetin qasterleıtin densaýlyǵy myqty, óresi bıik azamat kerek. Sol azamatty tańdaýymyz kerek. Ozyq tehnologıalardyń bilgiri, jahandyq deńgeıdegi kásibı maman bolýy kerek. Ár jerge baryp jumys isteı alatyn bolýy qajet. Mysaly, biz aıtamyz, Baltyq jaǵalaýyndaǵy elderdiń jastarynyń kópshiligi batysqa ketip qalyp júr. Ýkraınalyqtar solaı istep jatyr. Túbinde olar eline paıdasyn tıgizedi. Ol úshin ana tilimen birge ásirese, aǵylshyn tilin kásibı túrde erkin meńgergen urpaqtyń ókili bolýy kerek. Sonda ǵana qazaqtyń azamaty dúnıejúzilik básekege saı bolady. Qytaıǵa barsań, aǵylshyn tilin biledi, Japonıaǵa barsań, aǵylshyn tilin biledi, Úndistanǵa, Malaızıaǵa barsań da aǵylshyn tilin biledi. Biraz ýaqyttan keıin eshqandaı ǵylym men tehnologıa kelmeıtinin bilgennen keıin barlyǵy dúnıe júzi qoldanatyn tilge kóshti. Endi biz osy másele tóńireginde qandaı iske kóshýimiz kerek? Barlyqtaryńyzdyń balalaryńyzdyń qaıda oqıtynyn bilemin ǵoı men. Sondyqtan da, aǵaıyn, alǵa qaraı jyljý úshin qoldaý jasaý kerek. Dúnıejúzinde biz básekeli bolý úshin osyny umytpaýymyz kerek. Jańa býyn kóshbasshy, básekege qabiletti ári otanshyl bolýy tıis. Biz tárbıelep jatqan jańa Qazaqstannyń prezıdentteri, menińshe, osyndaı qasıetterge ıe bolýy kerek. "Ǵylymnyń tamyry ashshy, jemisi tátti" degen qanatty sóz bar. Akademıanyń mereıli belesimen barshańyzdy taǵy da shyn júregimmen quttyqtaımyn. Barlyǵyńyzdyń qajyrly eńbekterińiz jemisti bolsyn, eldiń ıgiligine, Máńgilik el bolamyz degen ıdeologıaǵa saı bolaıyq. Jumystaryńyzǵa sáttilik tileımin!", - dedi Memleket basshysy.