Sońǵy ýaqytta Qazaqstandaǵy qor bırjasynda qyzyq jaǵdaı oryn alyp jatyr: teńge -dollarǵa qatysty nyǵaıyp, al rúblge qatysty kerisinshe álsirep barady.
22 aqpanda ótken kúndizgi sesıa qorytyndysynda dollardyń ortasha baǵamy T+0 esebi boıynsha saýda kóleminiń $218,5 mln bolǵandyǵyn esepke alǵanda $1 dollar úshin 313,45 teńgeni qurady.
Sol kúni rúbldiń ortasha baǵamy T+0 esebi boıynsha saýda kóleminiń 10 mln rúbl bolǵandyǵyn eseptegende 1 rúbl úshin 5,4600 teńgeni qurady.
KASE-daǵy dollar kýrsy qańtardyń sońynda jyldyq mınımýmdaryn jańartyp, óziniń pozısıasyn joǵalta bastady.
Qys bastalysymen AQSH valútasy teńgege qatysty 9% -ǵa arzandaǵan. $1 úshin 341 den 314 teńgege deıin arzandaǵan.
Al rúblge qatysty nyǵaıý baıqalmady. Forbes.kz jýrnaly sarapshylar pikirinen sholý usyndy.
«Asyl-Invest» AQ-nyń dırektory Nurlan Rahymbaev bul jaıynda: «Ulttyq bank byltyrǵy jyldyń qyrkúıeginen bastap valúta bırjasyna, dollar baǵamynyń ózgeristerne qatystary joq ekenin aıtyp otyr.
Osy aqparatty eskere otyryp, teńgeniń dollarǵa qatysty nyǵaıýy naryqtyq faktorlarǵa baılanysty bolýy múmkin»- deıdi sarapshy.
Ol faktorlardyń ishinde: munaı baǵasynyń ósýi, valúta depozıtterine tigisterdiń azaıýy, naryq qatysýshylarynyń dollardan teńgege kóshý prosesiniń júzege asyrylýy jáne t.b. bar.
«Munaı naryǵynyń qalpyna kelýine qaramastan teńgeniń tómendep ketýi qaýiptiligi osy jyl boıy saqtalady. Bul boljam dollardyń álemdik naryqta nyǵaıýy men AQSH-taǵy munaı qorynyń ósýimen tikeleı baılanysty. 2017 jyldyń bastalýymen munaı baǵasy qalypty jaǵdaıǵa tústi» -dep óziniń oıyn bildirdi.
Ulttyq valútanyń dollar men rúblge qatysty eki túrli jaǵdaıda bolýyn «Sesna Kapıtal» AQ-nyń analıtıgi Darhan Lukpanov bylaı dep túsindirdi:
-Reseı men Qazaqstan ekonomıkasynyń qurylymy uqsas jáne valúta baǵamdary da birdeı faktordyń yqpalymen ózgeriske túsedi. Máselen byltyrǵy jyly rúbl dollar baǵamyna jyldamyraq ıkemdelip, nyǵaıdy. Onyń sebebi, Reseı naryǵynyń kapıtalanyń sheteldik ınvestorlarǵa qoljetimdiligimen túsindirildi.
Alaıda, osy oraıda Ulttyq bank teńge baǵamyn rúblge qatysty nyǵaıtýǵa baılanysty shara qoldanýǵa asyqpaıtynyn atap ótý qajet.
-Teńgeniń dollarǵa qatysty nyǵaıý prosesi qysqamerzimdi. Bizdiń boljam boıynsha, teńgeniń nyǵaıýy jaqyn arada toqtap, jańa deńgeıdegi qalyptylyq saqtalady.
-Bizdi qyzyqtyratyn másele Reseı nyǵaıyp kele jatqan rúblge qatysty ne oılaıdy? Rúbl nyǵaıǵan saıyn, Reseı Federasıasy valútasynyń nyǵaıýyna qatysty beıtaraptyq qatynasyn baıqaýǵa bolady. Reseı Qarjylyq Mınıstirligi shetel valútasyn satyp alý áreketterin júrgizip, memleket mekemeleri rúbldiń nyǵaıýyn kútpeý qajet degen pikir bildirýde-deıdi.
«Kazkommers Sekúrıtız» AQ Departamentiniń aktıvterdi basqarý dırektory Aıvar Baıkenov teńge men rúbl qubylmalyq jaǵynan ózgeshelenetinin atap ótti.
- Sońǵy ýaqyttary rúbldiń nyǵaıýy baıqalyp, teńge kerisinshe álsizdengen.Onyń sebebi shetel kapıtalynyń alyp-satarlyq túsimi joq ekendigimen túsindiriledi.
Teńgeniń nyǵaıýyn analıtık salyq tólemderiniń nátıjesi- deıdi.
- AQSH-tyń naryqtyq statısıkasynyń nasharlaýy munaı baǵasynyń tómendeýine alyp kelýi múmkin. Rúbl de óz kezeginde qysqamerzimdi qunsyzdanýdy $1 úshin 60-63 rúbl bastan keshirýi múmkin. İshki naryqtaǵy tigisterdiń azaıýy men teńgeniń nyǵaıý fakti dollorızasıaǵa ákep soǵýy múmkin. (Dollorızasıa- dolllar valútasynyń memleket ishinde jıi qoldanysqa ıenýi, tipti ulttyq valútany shettetýge deıin). Teńgeniń 1$ úshin 330 teńgege deıin túsýi baıqalýy múmkin, alaıda bul jaǵdaı qysqamerzimde oryn alady dep boljalýda -deıdi Aıvar Baıkenov.
Aýdarǵan: Nazerke Musa
