«Ákim» sóziniń qaı zamanda, qandaı maǵynada paıda bolǵanyn eshkim de dóp basyp aıta almaıdy. Negizgi túp maǵynasyn da kóp adam bilmese kerek. Tipti ákim laýazymyndaǵy qurmetti myrzalardyń da bilmeıtini daýsyz. Bir jaǵynan bul keshirimdi de. Qazaq tili Abaı atamyz aıtqandaı «tolǵaýy toqsan» óte kóne til. Ákim aǵalarymyz qazaqtyń qaı sóziniń maǵynasyn, shyǵý tarıhyn zerttep jatsyn. Nıeti bolǵanymen memlekettik qyzmet, qoǵamdyq jumystar qol baılaý.  Oıdy oı qozǵap, sózden sóz týady. Ákim sóziniń tarıhyna úńilgen boldyq. Naǵyz «ákim» atyna qandaı azamat laıyq ekenin anyqtaýdy maqsat tuttyq. «Ákim» sózi týraly kezikken qyzyqty bir derekti usynýdy jón kórdik.

   Qaz daýysty Qazybek bı Ánet babaǵa sálem bere baryp, bir aýyz ósıet aıtýdy ótinse kerek. Sonda Ánet baba tereń oıǵa batyp:

          -Jaraıdy, aıtaıyn. «Ákim» degen sózdi jadyńda saqta, - depti. Qazybek bı Ánet babaǵa rızashylyǵyn bildirip, jora-joldastarymen eline qaıtady. Ol jol-jónekeı janyndaǵy joldastarynan:

          -Ánet babanyń qandaı ósıet aıtqanyn uqtyńdar ma? – dep suraıdy. Biraq bul saýalǵa eshkim úndemeıdi.  Sonda qaz daýysty Qazybek bı Ánet babanyń aıtqan ósıetin bylaı dep sheshipti:

          -«Á» degeni – ádil bol,

          -«K» degeni – kúnshil bolma, kópshil bol.

          -«İ» degeni – iltıpatty bol,

          -«M» degeni – menmen bolma, meıirman bol, - degeni» Bul ósıet Ánet babadan Qazybek bıge, Qazybek bıden qarǵa tamyrly qazaqqa mura bolyp qaldy. Naǵyz ákim atyna osy ósıetke saı keletin azamat laıyq sekildi...

          Qurmetti, ákim aǵalar! Egerde qolyńyz qalt etip, osy maqalany oqyp otyrǵan bolsańyz oılanyńyz. Qandaı ákim ekenińizdi bilgińiz kelse, Ánet babanyń ósıetindegi ákimmen ózińizdi salystyra qarańyz.

          Sonymen, Siz, qandaı ákim boldyńyz?!

Ishanbekov Madıar İleskenuly

Jambyl oblysy, Sarysý aýdany, Saýdakent