Astana kóshiliriniń birine Islam Kárimovtyń esimin berý máselesi bir aptadan soń talqylanatyn bolady. Bul jaıynda Astana qalasynyń tilderdi damytý jónindegi keńesiniń jetekshisi Tileýǵalı Qyshqashbaev «Kazınform» jańalyqtar qyzmetiniń tilshisine bergen suhbatynda aıtty.

«Kóshege Islam Kárimovtyń esimin berý máselesi bir aptadan keıin talqylanýy múmkin. Biz Syrtqy ister mınıstrliginen eki el arasyndaǵy Halyqaralyq kelisim jaıynda hat alǵan bolatynbyz. Hatta Qabanbaı batyr men Turan kósheleriniń ortasynda ornalasqan uzyndyǵy 682 metr bolatyn  E-109 kóshesine Islam Kárimovtyń esimin berý jaıynda jazyldy».

Onyń aıtýynsha, kóshege at berý máselesi qalalyq máslıhattyń otyrysynda qaralǵan.

Sondaı-aq Tileýǵalı Qyshqashbaev Ózbekstanda elimizdiń talaı azamattary jerlengenin, Ózbekstandaǵy Tóle bı atyndaǵy murjaı da sol memlekettiń eesebinde jumys isteıtinin aıtty.   
 Ózbekstannyń Qazaqstanǵa degen qurmeti erekshe ekenin de aıtyp qaldy. Tashkentte elimizdiń tarıhı tulǵalary Abaı, Tóle bıdiń atymen atalǵan kósheler bar.