Birneshe kúnniń aldynda Ýkraına qorǵanys mınıstri Valerıı Geleteı óziniń feısbýk paraqshasynda Kıev Shyǵys Ýkraınadaǵy búlikshilermen aradaǵy soǵysty jalǵastyrǵanyn toqtatpasa, Reseı taraptyń ıadrolyq shabýyl jasaıtyndyǵy týraly qoqanloqy jasaǵanyn jarıa etken edi . «Máskeý bizge dóńaıbat kórsetýde. Eger, biz búlikshilermen soǵysty toqtatpasaq, Máskeýdiń bizge tehnıkalyq ıadrolyq qarý qoldanýǵa daıyn ekendikterin Reseıdiń resmı emes telearnalary arqyly bizge eskertip úreı salýda» ,-deıdi Ýkraın mınıstri.
Ol taǵy Kremldiń Ýkraınadaǵy «gıbrıdtyq soǵysynyń» aıaqtalyp, endi « tolyqtaı shabýylǵa» ótkenin aıtqan.
Dúısenbi kúni Ýkraına qorǵanys mınıstri Valerıı Geleteı feısbýginde Shyǵys Ýkraınadaǵy qaıshylyqtyń sońy surapyl soǵysqa ulasqanyn, al, Reseıdiń Ýkraınaǵa shabýyl jasaıtyn jaǵdaıǵa tolqytaı daıyn kúıde turǵanyn aıtqan edi.
«Ekinshi Dúnıejúzilik Soǵystan beri Eýropanyń esigin qaqpaı ketken bir joıqyn soǵys tabaldyryqtan attaǵaly tur ... Biz Reseıge qarsy qýatty qorǵanysty júrgizýimiz kerek»,-deıdi ol.
Al, Reseı qarýly kúshteri qyrkúıek aıynda Altaı óńirinde, Qazaqstan shekarasyna jaqyn aımaqta úlken áskerı jattyǵý ótkizbekshi ekendigin birneshe kúnniń aldynda Reseı strategıalyq maqsattaǵy zymyran kúshteri qolbasshylyǵynyń ókiline silteme jasaǵan reseılik "RIA Novostı" agenttigi habarlady. Al, bul týraly brıtandyq «Voice of Russia» aqparaty « Reseı negizgi strategıalyq ıadrolyq arsenal qorǵanysy jattyǵýyn ótkizetinin jarıa etti» degen taqyrypta maqala jarıalap, bul iri áskerı jattyǵýda ıadrolyq arsenaldardyń da bar ekendikterin aıtyp, Batysqa dabyl qaqty. «Ýelstegi NATO samıtynan bir kún buryn Máskeýdiń iri áskerı jattyǵý ótkizetini týraly reseılik "RIA Novostı" habarlady»,- deıdi «Voice of Russia».
« NATO men Reseı taraptary Ýkraınadaǵy qaıshylyq bastalǵaly beri jarysyp áskerı jattyǵýlar ótkizýde»,-deıdi atalǵan brıtandyq aqparat kózi.
Al, NATO-lyqtar shyǵys Eýropadaǵy odaqtastaraymen birge Reseı taraptan keletin barlyq múmkin bolǵan agresıaǵa daıyn ekendikterin málimdegen edi. « Bul daıyndyq josparymyz boıynsha, biz durys orynda durys áskerı kúsh pen durys qurylymdardy ornalastyrdyq»,-deıdi NATO bas hatshysy Andres Fog Rasmýssen.
Bir qyzyǵy Reseıdiń Qazaqstanmen shekaralas aımaqta ótkizetin áskerı jattyǵýyna elimizdiń de áskerleri qatysatyn kórinedi. Esterińizde bolsa Reseıdiń Syrtqy ister mınıstri Lavrov jaqynda ǵana Shyǵys Qazaqstanǵa resmı saparmen kelgen bolatyn.
T.Shansharbek
