Kishkentaı, tipti kishkentaı kezimniń ózinde sheshem marqum jatarda kıetin kóılegimdi kıgizip, basymdy oramalmen tastaı qylyp baılaıdy. Sóıtedi de: «Balam, tún – tylsym, tún – aýyr. Túnde jyn-shaıtan elirip, adamnyń ashyq-shashyq jerine úıir bolady» deıdi. Mine, sodan beri basymnan oramal túsken joq. Árıne, jastaý kezimde taqıa da kıdim, beret te kıdim, shlápa da kıdim. Al, kelin bolyp túskeli ashyq-shashyq júrip kórgenim joq. Osynyń barlyǵy – anamnyń tárbıesi. Meniń jas ekenimde, qatarymmen birge oınap-kúlgim keletininde, sońǵy sán úlgisimen kıingim keletininde jumysy joq bolatyn sheshemniń. Tipti, «Tańerteń qol jýmaı, ot jaǵýǵa bolmaıdy. Ot – úıdiń kıesi, ımany. Áýeli qol jýyp baryp, ot tutatý kerek. Óıtkeni, uıyqtap jatqanyńda qolyńmen qaı jerińdi ustaǵanyńdy qaıdan bilesiń. Qolyń taza emes. Sosyn, as úıge jalańbas kirýshi bolma. Eger pisirgen tamaǵyńnan seniń shashyń shyǵyp jatsa, ol tamaq – aram. Ony eshkim jemeıdi. Bir tal shash abyroıyńdy tógedi» degendi únemi aıtyp, sanamyzǵa sińirip tastaǵan.
Keıin ózim basymnan tastamaıtyn oramaldyń kıesin de, qasıetin de uqtym. Oramal – qazaq áıeliniń qorǵany. Jalańbas, ashyq-shashyq júretin áıelderge jaman energıa kóp ótedi. Sosyn aýrýshań, minezi uıqy-tuıqy áıel kóbeıedi. Osynyń barlyǵyn ata-babamyz baıaǵyda bilip, turmystyń buljymas zańyna aınaldyryp jibergen. Qazir ǵoı, bárin umytyp ketkenimiz.
Zeınep Ahmetova
