1963 jyly Barbadosta Djenıfer men Djýn Gıbons esimdi egiz qyzdar dúnıge keldi. Qyzdar tek bir-birimen ǵana sóılesetin. Olar ózderi ǵana túsinetin tildi oılap tapty. Dárigerlerdiń biri egizderdiń sózderin dıktafonǵa jazyp alyp, olardyń aǵylshynsha sóıleıtinin anyqtaǵan. Óte jyldam sóılegendikten olardy basqalar túsinbegen. Keıbir ǵalymdar buny egizderdiń ıntellektýaldyq deńgeıiniń joǵary damyǵanynyń belgisi dep esepteıdi.
Qyzdar dúnıege kelgennen keıin otbasymen Ýelske kóshedi. Qurdastarynyń arasynda jalǵyz qara násildi bolǵandyqtan, olardyń tarapynan kemsitý, qorlaýǵa jıi ushyraıtyn. Osydan keıin olar syrtqy ortadan buryńǵysynan da oqshaýlana tústi.
Egizderdiń bir-birine degen mahabbaty qanshalyqty kúshti bolsa, jekkórýshilik sezimi sonshalyqty myqty boldy. Djýn óziniń kúndeliginde ápkesin alyp kóleńke sekildi álemdi mennen oqshaýlady dep jazǵan. Djenıfer de ekeýiniń arasynda tunshyqtyratyn qarym-qatynas ornaǵanyn jazǵan.
Dáriger men ata-anasy qyzdardy eki bólek oqý ornyna jiberedi. Alaıda, mundaı ádis keri áserin berip, olar buryńǵysynan beter syrtqy ortadan ózderin alshaqtaı bastady.
Qyzdar qaıta qaýyshqannan keıin romandar men áńgimeler jaza bastaıdy. Alaıda olardyń jazbalary zorlyq-zombylyq, qatigezdik týraly bolǵan. Baspahanalar men BAQ egizderdiń jazbalaryn shyǵarýdan bas tartty. Osydan keıin ápkeli-sińli adamdarǵa shabýyl jasap, urlyqqa barady. Qyzdardyń psıhologıalyq jaǵdaıyn tekserý barysynda olarda psıhıkalyq aýytqýlar bar ekendigi anyqtalǵan. Egizderdi psıhıatrıalyq aýrýhanaǵa jatqyzady. 11 jyl ómirin qyzdar sonda ótkizdi.
Aýrýhanada Djenıfer men Djýn birimiz baqytty ǵumyr keshýimiz úshin birimiz ólýimiz kerek degen uıǵarymǵa kelgen. Djenıfer ózine qol jumsaýǵa bekinedi. Egizderdi basqa mekemege aýystyrǵanda Djenıfer ápkesiniń aldynda óli kúıinde jatqan. Medısınalyq tekserý barysynda mıokardıdan kóz jumǵany belgili boldy. Alaıda qyzdyń qanynan júregine áser etetin eshqandaı dári tabylmaǵan. Ol kezde Djenıferdiń jasy 30-da edi.
Qazir Djýn Gıbbs ata-anasynyń úıinde turady. Onyń jasy 53-te jáne ol áleýmettik ortaǵa beıimdelgen. Desek te, ony barlyǵy túsine bermeıdi.
