Senattyń Ekonomıkalyq saıasat, ınovasıalyq damý jáne kásipkerlik komıtetiniń keńeıtilgen otyrysynda «Qazaqstan Respýblıkasynyń keıbir zańnamalyq aktilerine áýe keńistigin paıdalaný jáne avıasıa qyzmeti máseleleri boıynsha ózgerister men tolyqtyrýlar engizý týraly» zań jobasy qaraldy.
Zań jobasynyń maqsaty azamattyq avıasıa jáne áýe keńistigin paıdalaný salasyndaǵy Qazaqstan Respýblıkasynyń zańnamasyn jetildirý, sondaı-aq ony Halyqaralyq azamattyq avıasıa uıymynyń (IKAO) standarttaryna sáıkes keltirý bolyp tabylady. Zań jobasy áýe keńistigin jáne avıasıa qyzmetin paıdalaný salasyndaǵy baqylaý men qadaǵalaýdy kúsheıtýge, kórsetiletin qyzmetterdiń sapasyn kóterý men ushý qaýipsizdigin qamtamasyz etýde jaýaptylyqty arttyrýǵa baǵyttalǵan.
Zań jobasy aıasynda sheteldik tasymaldaýshylardy akredıtteý, komersıalyq emes uıymdardy tartý jáne áýe kemelerin paıdalanýshylardyń, aeronavıgasıalyq qyzmet kórsetýshilerdiń, avıasıalyq oqý ortalyqtarynyń qyzmetin qadaǵalaý bóliginde azamattyq avıasıa salasyndaǵy ýákiletti organnyń quzyreti naqtylanady jáne tolyqtyrylady. Avıasıa qyzmetkerlerin medısınalyq kýálandyrý júıesin jetildirý kózdeledi, avıasıalyq medısınalyq ortalyqtardy sertıfıkattaýdyń jańa túri usynylady. Tergep-tekserý jónindegi ýákildiń qyzmeti retteledi.
Zań jobasynyń birqatar erejeleri azamattyq avıasıada avıasıalyq qaýipsizdik baǵdarlamasyn engizý, medısınalyq sarapshylarǵa, aeronavıgasıalyq qyzmet kórsetýdi berýshilerge jáne laýazymdy adamdarǵa jaýaptylyqty bekitý, sondaı-aq sertıfıkasıalyq tekserý kezinde sanattardy engizý arqyly avıasıalyq qaýipsizdikti qamtamasyz etýge baǵyttalǵan.
Odan basqa, zań jobasymen shaǵyn avıasıany damytýdaǵy, ushqyshsyz ushatyn apparattaryn esepke alýdaǵy, arnaýly ushýǵa ruqsat alýdaǵy, áýe kemelerin paıdalanýshylarǵa jalǵa berýde ákimshilik kedergilerdi joıýǵa qatysty erejeler engiziledi.
Zań jobasy Palatanyń qaraýyna jiberildi.
