Kereký qalasynyń shetindegi shaǵyn aýdannyń halqy ol áıeldi túgeldeı tanıdy deýge bolady. Onyń aty Sezim. Otyzǵa endi ǵana jetken jas áıel dárigerlerdiń qateliginen bolyp eki kózinen birdeı aıyrylsa da kúnde ertemen aıaladamalardyń birinen qalaǵa qatynaıtyn avtobýstarǵa ózi minip qyzmetine baryp-kelip júredi.
Onyń eki kózi sý qarańǵy bolǵan alǵashqy kezderde bul álemdegi seneri men súıeneri bir Alladan keıin kúıeýi ǵana boldy. Kúıeýi áskerı adam. Baǵyna qaraı joldasy Jandos ımandy, taza jan edi. Áıeliniń eki kózi zaǵıp bolyp qalǵanda ishinen qan jylap tursa da, áıeliniń aldaǵy ýaqyttarda óz basyn alyp júrýine, adam retinde eshkimge jáne eshnársege táýeldi bolmaı ómir súrýine barynsha qoldaý kórsetýim qajet dep sheshipti.
Sezim de qap-qarańǵy bolǵan jańa ómirine kún ótken saıyn azdap-azdap úırene bastaıdy. Úıde otyrǵan kezinde jeńil-jelpi úı sharýalaryn aqyryndap istep úırenedi. Tipten eki kózi kórmeı qalýy sonshalyqty aýyr emesteı seziletin kezderi de bolypty. Jandostyń qamqorlyǵy da barynsha artady. Bastaryna kún týǵan osy sátterde olardyń ózara syılastyǵy men bir-birine degen súıispenshiligi de arta túsken bolatyn.
Kún artynan kún ótip Sezimniń em alatyn merzimi de aıaqtalyp óz jumysyna qaıta kiretin ýaqyty da jetipti. Deni saý kezde úı men jumys arasy alys bolsa da avtobýspen emin-erkin júre beretin Sezim úshin qazirgi sý qarańǵy bolǵan kezinde jumysyna baryp-kelý álbette, qıamet-qaıymmen birdeı. Sondyqtan da bastapqy kezde Jandos taksı jaldap áıelin jumysyna qoıyp jetkizdirip, aldyryp turdy jáne ózi únemi birge ertip aparyp, keler saǵatynda tosyp alatyn. Sondyqtan Sezimniń kóńili ornyqty boldy.
Biraq osylaısha únemi asty-ústine túsip, qorǵap-qolpashtaý eshbir nátıje bermeıdi, ári basqalarǵa táýeldiligi arta beredi degen oı Jandostyń kóńiline keledi de bir keshte áıeline osy oıyn aıtqanda Sezim: «Nemene?...sen ne aıtyp tursyń, men kórmeıtin soqyr adam emespin be, qaıda bara jatqanymdy qalaı ajyratpaqpyn?.. Uzamaı sen meni tastap ketetin shyǵarsyń, men sonda qalaısha tiri júremin?...»,-dep eńirep bulqan-talqan bolǵanda «shyn jylasa soqyr kózden jas shyǵatynynyń» kerin keltirip edi. Áıeliniń osylaı kúıingenine Jandostyń jany shyǵarda bólek bolǵandyqtan «Men seni óziń jumysyńa baryp-kelip úırengenińshe avtobýspen birge júretin bolamyn» dep kelisedi. Osylaısha 2 apta boıy Jandos áskerı kıimin kıip alyp áıelimen birge ony jumysyna jetkizip salyp júrdi. Osy 2 apta ýaqytta olar kórýden basqa sezim músheleri arqyly mańaıyndaǵy zattardy qalaı ajyratý, qandaı nárselerden saqtanyp júrý týraly birshama tájirıbeler jasap úırenedi. Sonymen qatar Sezimniń jumysyna barar baǵyttaǵy avtobýs shoferlerimen de tanysyp, Sezimge únemi bir bos oryn saqtap qoıýdy tapsyrypty.
Álbette, adamdar ózderi talaptanyp áreket etse qandaı da qıynshylyqty jeńetini belgili.Sonymen kúnderdiń bir kúni Sezim erte turyp, jumysyna jalǵyz ózi bara bastaıdy. Alǵashqy kezderi oǵan jalǵyz júrý óte qıyn bolsa da kún ótken saıyn jeńildep, júris-turysy erkindep qalypty ádetterge tóselip úırenip ketedi. Sonymen ne kerek, úsh aı boıy osylaısha jalǵyz ózi jumysyna baryp kelip júrdi.
Bir kúni ádettegideı jumysyna barý úshin avtobýsqa otyryp jatqanynda avtobýs shopyry oǵan: «Siz óte baqytty adam ekensiz!» dedi. «Soqyr adam qalaısha baqytty bolmaq?» dep jaýap qatqanynda shopyr: « Men únemi baıqap júremin. Kún saıyn Siz avtobýsqa otyrǵaly kelgenińizde áskerı kıimi bar ádemi erkek sońyńyzdan ere keledi de Siz avtobýstan túsip kóshe boıymen jumysyńyzǵa jetkenshe syrtyńyzdan qaraýyldap, jumys ornyńyzǵa kirgen kezde Sizge alystan qol bulǵap, súıý ısharasyn jasaıdy da burylyp ketedi. Ótirik aıtsam jer jutsyn, onyń osylaı júrgenine 3 aı ýaqyt boldy» depti.
Shopyr osylaı degende Sezimniń kózine qýanysh jasy móltildedi. Óıtkeni ol áıel baqytty edi, Alla taǵala onyń kóretin kózin alsa da oǵan kóńil kózi ashyq ómirlik adal jardy násip etken bolatyn...
Amantaı Toıshybaıuly, mazhab.kz
