Esterińizde bolsa,  ushyrylǵan «QazSat-1» ǵaryshqa baryp ǵaıyp bolyp ketkenen keıin, artynan ile-shala  «QazSat-2» ushyryldy. Senseńiz de, senbeseńiz de ótirik aıtsam ózime tısin. Sol «QazSat-2» ǵaryshqa sátti jetkennen keıin baıaǵyda ǵaryshqa baryp qańǵyp ketken aǵasy «QazSat-1»-di surastyryp izdeý salypty. Endi qaıtsin?! Týystyq qany jibermegen bolar, ekeýi de reseılik bir zaýyttyń qursaǵynan shyqty emes pe?! Ózinen bes jas úlken aǵasynyń qaıtys bolsa qańqasyn, tiri bolsa temirin izdep tabýǵa bel baılapty.

Ǵaryshqa jańadan qadam basqandyqtan ózim de aǵam sıaqty adasyp ketpeıin dep bulardan áldeqaıda erte kelgen japon jasandy jerserigi «JapSat»-qa osydan bes jyl buryn joǵalyp ketken aǵasynyń deregin bilip berýge qolqa salypty. Biraq, «JapSat»:

– Saǵan kómekteskenimdi bilse samýraılar saqalymdy qyrqady. Renjime, baýyrym, meniń ýaqtym joq, – dep shyǵaryp salypty.

Amaly taýsylǵan «QazSat-2» «endi bir kómektesse osy kómekteser, pysyq halyqtyń uly ǵoı» dep qytaı jerserigi «QytSat»-qa baryp aǵasyn tabýǵa kómektesýdi ótinipti. «QytSat» ishinen bir qýlyq oılap ári «QazSat-2»-niń eshteńe bilmeıtin, jer sharynan jańa kelgen ańqaýlyǵyn paıdalanyp qalýdy kózdepti. «Aǵańdy men taýyp berem» dep jyly sózderimen, jumsaq minezimen jibitip otyryp, «QazSat-2»-ge ǵaryshqa baryp jumys isteýi úshin qaltasyna salyp bergen qazaqtardyń 115 mln. dollar aqshasynyń jartysyn sypyryp alypty da ózin jolǵa salypty. «QytSat»-tan jábir kórgen «QazSat-2» «bir járdem etse osy járdem eter» dep ǵaryshtyń turaqty turǵynyna aınalǵan Amerıka jerserigi «AmırSat»-qa baryp jaǵdaıyn túsindirip, qolǵabys etýdi surapty. «AmırSat» basqalaryna qaraǵanda elpek kórinipti. «QytSat»-ty adamdyq quqyqqa qol suqty dep aıyptap, «QazSat-2»-ge aǵasynyń deregin aıtypty. 

Onyń aıtýynsha, «QazSat-1» jerdegi qazaqtarǵa: «Meni ǵaryshqa ushyryńdar sonda sender telefonmen tegin sóılesesińder ári aýylda otyryp-aq alpys kanaldy teledıdardan telmirip otyryp tamashalaısyńdar» dep ýádeni úıip beripti. Kelsimshart jasap 65 mln. dollar sanap alyp, jerden áldeqaıda alystap ketkesin bir kúnde qazaqtarǵa kórinbeı ǵaıyp bolypty da «AmırSat»-tyń qasyna kelipti.

«QazSat-1» men «AmırSat» birge turady eken. Sol jerde «QazSat-2» men aǵasy «QazSat-1» «oı, baýrymdap» qushaqtasyp kórsipti.

«AmırSat» jumys ýaqty bastalǵanyn jerdegi otandastary ózinen habar kútip otyrǵanyn aıtyp  aǵaıyndy ekeýin ońasha qaldyryp jumysyna ketipti. Ońasha qalǵan «QazSat-1» inisine:  

– Sen de bir kúnde qazaqtardy kóz jazdyryp ket, –  dep aqyl aıtypty. Oǵan «QazSat-2» qazaqtardyń ózine baqylaýdy kúsheıtkenin aıtyp bas tartypty. Sonda da «QazSat-1» qoımaı:

– Sen alatyn kóp aqshańdy aldyń. Endi nesin qorqasyń? Jumysqa aıyna eki ret shyqsań boldy emes pe? –  dep aǵalyq aqylyn aıtypty. Oǵan «QazSat-2 qazaqtardan uıat bolmaı ma?» dese kerek, «QazSat-1»: 

– Qaraýsyz qalǵan Qazekeńniń baılyǵyn kim tonamaı jatyr deısiń táıiri, anaý qasqa bas Áblázov  uıalmaǵanda biz uıalamyz ba? – dep zekip tastaǵan kórinedi. Sodan bastap «QazSat-2» de tolyq jumys istemegendikten jerdegi bizdiń telefon jalǵaǵanda birilgimizdiń bir mınýtta bilinbeı mınýsqa syrǵyp ketetini sodan bolsa kerek. 

Osy áńgimeni ótkir qulaǵym estigende taqyr basymnyń tóbesine bir oı keldi. Qadirmendi ushqysh qazaqtar! Biz qurǵyr «QazSat-3»-ti ushyrmaı-aq qoıaıyqshy, ol da orystyń qolynan shyqqan qý ǵoı, aqshany alyp alǵasyn aldyndaǵy eki aǵasynyń tirligin qaıtalamasyna kim kepil?.. Sosyn biz qala beremiz basymyzdy qushaqtap. Aqsha da joq, apparat ta joq....

Jarqynbek Jumadil