Halyqaralyq stýdenttik sport federasıasynyń (International University Sports Federation – FISU) basshysy Oleg Matysın 28-shi Dúnıejúzilik qysqy Ýnıversıada oıyndaryn ótkizýge qoldaý bildirgeni  úshin Qazaqstan Respýblıkasynyń Prezıdenti Nursultan Nazarbaevqa alǵys bildirdi.  

«Halyqaralyq stýdenttik sport federasıasy atynan jáne jeke óz atymnan jobaǵa turaqty qoldaý bildirgenińiz úshin alǵys bildiremin. Ýnıversıada men Qazaqstan quramasynyń tabysy stýdenttik sporttyń damýyna jáne jastar arasynda salaýatty ómir saltyn nasıhattaýǵa orasan kúsh bererine senimdimin», - delingen O.Matysınniń jedelhatynda.

Sonymen birge, federasıa basshysy oıyndar teleaýdıtorıasynyń 70 memleketti qamtyǵanyn, munyń halyqaralyq arenada Qazaqstan bedelin nyǵaıta túskenin atap ótti. Uıymdastyrý komıteti, Almaty qalasynyń ákimdigi jáne Qazaqstan stýdenttik sport federasıasynyń úılesimdi jumysynyń arqasynda Almatyda ótken búkilálemdik stýdenttik qysqy oıyndardyń joǵary deńgeıde ótkenin jáne Qazaqstannyń mýltısporttyq jarystardy uıymdastyrýǵa daıyn ekenin basa aıtty.

«Kóptegen sheteldik qonaqtardyń pikirinshe, Almatyda ótken bul shara búkilálemdik qysqy stýdenttik oıyndar tarıhyndaǵy eń úzdik Ýnıversıada boldy. Barlyǵy Almatyǵa kelgen 3 myńǵa jýyq sportshynyń, resmı tulǵalardyń jáne sheteldik qonaqtardyń saparyn umytylmastaı etken Qazaqstan turǵyndarynyń qonaqjaılylyǵyna, kishipeıildiligine tánti boldy», - dep jazdy Matysın.

Eske sala ketsek, 2017 jyly 29 qańtar - 8 aqpan aralyǵynda Almatyda HHVIII qysqy Ýnıversıada oıyndary ótti. Oǵan 57 elden 2000-ǵa jýyq sportshy qatysty. Ýnıversıada oıyndarynda 12 saıys boıynsha 85 medal jıyntyǵy sarapqa salyndy. Jalpy komandalyq esepte 28 altyn, 27 kúmis jáne 15 qola medal alǵan Reseı quramasy birinshi oryn aldy. Qazaqstan 11 altyn, 8 kúmis jáne 17 qola jeńip alyp, ekinshi orynǵa taban tiredi. Úzdik úshtikti 11 altyn, 5 kúmis jáne  5 qola medalmen Ońtústik Koreıa túıindedi.