Ortalyq komýnıkasıalar qyzmetinde Qostanaı oblysynyń ákimi Arhımed Muhambetovtyń qatysýymen Memleket basshysynyń Qazaqstan halqyna «Qazaqstannyń úshinshi jańǵyrýy: jahandyq básekege qabilettilik» atty Joldaýy aıasynda Qostanaı oblysynyń áleýmettik-ekonomıkalyq damýy men 2017 jylǵa qoıylǵan mindetteri taqyrybynda brıfıń ótti dep habarlaıdy "Qamshy" aqparattyq agenttigi.

Óńir basshysy óz baıandamasynda oblystyń búgingi hal-aqýalyna toqtalyp, damý barysynan aqpar berdi.

«Elbasy Joldaýyn júzege asyrý maqsatynda, Qostanaı oblysynda belsendi jumys júrgizilip, aldymyzǵa qoıylǵan tapsyrmalardy iske asyrýǵa baǵyttalǵan is-sharalar kesheni oryndalýda. 2016 jyldyń qorytyndysy boıynsha oblys ekonomıkasynyń  údemeli damý serpini, bizde Memleket basshysy alǵa qoıǵan barlyq mindetterdi is júzinde oıdaǵydaı oryndaý úshin jetkilikti negiz qalandy dep aıtýǵa múmkindik beredi. Máselen, ónerkásipte (naqty kólem ındeksi -100,3%), aýyl sharýashylyǵynda (naqty kólem ındeksi – 102,3%), bólshek saýdada (naqty kólem ındeksi - 101,7%) oń nátıjeler baıqalady. Negizgi kapıtalǵa salynǵan ınvestısıalar 6%-ǵa ulǵaıtyldy. 2017 jyldyń basynan beri oń serpin saqtalýda. Ónerkásipte naqty kólem ındeksi 104,3% quraıdy (103,5 mlrd. teńge), bólshek saýdada 101,6% (34,2 mlrd. teńge). Oblys ekonomıkasyna shamamen 15 mlrd. teńge ınvestısıa tartyldy (naqty kólem ındeksi – 93,2%) – dedi Oblys basshysy.

Sonymen qatar ol, búgingi tańda ózekti boly otyrǵan sý basý qaýpin aldyn alý jumystaryna qatysty atqarylyp jatqan sharalardy da tilge tıek etti.

«Bizdiń oblysta ózender men sý qoımalary kóp bolǵandyqtan sý basý qaýpi bar aımaqtardyń qataryna kirip otyr. Bizdiń óńirde bundaı jaǵdaı 2013 jyly bolǵan. Bizdiń jumyla jumys jasaýymyzdyń arqasynda ol qıyndyqty da eńserdik. Bıyl da sol qarqynymyzdan taımaı, qaýiptiń aldyn-alý úshin qajetti tehnıkalardy daıyndaý ústindemiz» dedi ol.

Qostanaı oblysynda bıyl taǵy 3 zaýyt paıdalanýǵa beriledi

Zaýyttar tolyq iske qosylǵanda, onda turaqty 306 jumys orny ashylmaq. Kásiporyndardyń jalpy ınvestısıalyq  quny 16 mlrd. teńgeni quraıdy. Bul týraly Ortalyq komýnıkasıalar qyzmetinde ótken brıfıń barysynda Qostanaı oblysynyń ákimi Arhımed Muhambetov málim etti. 

Spıkerdiń aıtýynsha, sońǵy jyldary Qostanaı oblysynda jańa ónim túrlerin: aýylsharýashylyq tehnıkasy men kombaındardy, júk jáne jeńil avtomobılderin, bolat ılemin jáne kúnbaǵys maıyn shyǵarý jolǵa qoıylǵan. 

Sondaı-aq, oblysta eksportqa baǵdarlanǵan birqatar kásiporyndardy iske qosý josparlanǵan. Olardyń qatarynda maqsary maıyn óndiretin zaýyt jáne maıekstraksıalyq zaýyt bar. Zaýyt jumysyn tolyqqandy qamtamasyz etý úshin Qostanaı qalasynda, Taran jáne Fedorov aýdandarynda  3 elevatordyń qurylysy qolǵa alynbaq. Munyń syrtynda, qostanaılyq aýyl sharýashylyǵy taýarlaryn óndirýshilerde kásiporyn úshin shıkizat bolyp tabylatyn kúnbaǵys tuqymyn ósirýge múddelilik paıda bolady.

Oblys ákiminiń aıtýynsha, Qostanaı oblysy óńirge ınvestısıalar tartý jóninen júıeli jumys júrgizýde. Máseleń, ótken jyly oblys boıynsha syrtqy ınvestısıalar kólemi 11,1 mlrd. teńge quraǵan bolatyn, al  bul kórsetkish 2015 jylǵydan  11% artyq.

Áleýetti syrtqy ınvestorlardy tartý maqsatynda, búginde dıplomatıalyq korpýs úshin Qostanaı oblysynyń ınvestısıalyq áleýetiniń tanystyrylymy belsendi júrgizilýde.

«Aǵymdaǵy jyly Investısıalar tartý jónindegi ulttyq strategıa ázirlenetini belgili. Osyǵan oraı, Qostanaı oblysynda ınvestısıalar tartýdyń naqty tetikteri pysyqtalyp, basym salalary men nysanaly qarjy kózderi aıqyndalatyn bolady», - dedi oblys ákimi.